Гасцініцы не будзе, а замест манежа зробяць басейн. Як змяніўся праект вялікага спарткомплексу на выездзе з Гродна

Шматфункцыянальны спартыўны комплекс для гульнявых відаў спорту з лёгкаатлетычным манежам, які хочуць пабудаваць на вуліцы Белуша на выездзе з Гродна каля М6, паўторна выставілі на грамадскія абмеркаванні. Праект, які ўжо рыхтавалі, змяніўся.

Будынак спарткомплексу ўяўляе сабой выгнутую ў плане, выцягнутую форму. Вітражы тарцоў будынка арыентаваны на ўезд і выезд з Гродна адпаведна. Гэта, на думку праекціроўшчыкаў, дадае разнастайнасці ў агульнае ўспрыманне аб’екта.

Будынак комплексу ўключае ў сябе тры асноўныя аб’ёмы, аб’яднаныя агульнай уваходнай групай:

• гульнявая зала на 2000 гледачоў, дзе будуць праводзіцца асноўныя матчы чэмпіянатаў па міні-футболе, гандболе, валейболе і баскетболе міжнароднага ўзроўню;
• малая гульнявая зала на 500 гледачоў для трэніровачных заняткаў і адборачных турніраў (з магчымасцю праводзіць матчы міжнароднага ўзроўню);
• водна-тэрмальны блок на 500 гледачоў, які складаецца з асноўнага басейна 52×25м (са зменлівай глыбінёй ад 2 да 3 м) з платформай для падзелу воднай роўнядзі на дзве 25-метровыя часткі, басейна для навучання плаванню і блока саунаў. Гэты блок прызначаны для правядзення спаборніцтваў, трэніровак і аздараўленчага плавання.

Частка спарткомплексу з гульнявымі заламі будзе двухпавярховай, частку з басейнам пабудуюць аднапавярховай з трохпавярховай убудаванай часткай.

Участак для праектавання знаходзіцца каля ўсходняй мяжы Гродна. З поўдня ён абмежаваны вуліцай Белуша, з захаду — тэрыторыяй АЗС з мыйняй, з поўначы Скідзельскай шашой, з усходу зялёнай зонай, якая прымыкае да Карскага, і шматузроўневай развязкай. Адзначана, што тэрыторыя мае складаны рэльеф.

Калі пройдуць новыя абмеркаванні

Грамадскія абмеркаванні пройдуць з 23 студзеня па 16 лютага 2023 года. У гэты перыяд заўвагі і прапановы па праекце з пазнакай «грамадскае абмеркаванне» можна адправіць па адрасах:

• Гродзенскі гарадскі выканаўчы камітэт, пл. Леніна, 2/1, 230 023, г. Гродна. Электронная пошта: gorisp@gorod.grodno.by
• Упраўленне архітэктуры і горадабудаўніцтва Гродзенскага гарвыканкама, пл. а. Тызенгаўза, 3, 230 023, г. Гродна. Электронная пошта: arhitektura@gorod.grodno.by

Паглядзець на праект можна будзе з 23 студзеня па 6 лютага ў вестыбюлі будынка ўпраўлення будаўніцтва, архітэктуры і горадабудаўніцтва Гродзенскага гарвыканкама (А.Тызенгаўза, 3) па буднях, з 8.00 да 13.00 і з 14.00 да 17.00.

Прэзентацыя праекта адбудзецца 2 лютага ў 15.00 у кабінеце 1 на першым паверсе будынка ўпраўлення будаўніцтва, архітэктуры і горадабудаўніцтва.

Якім быў папярэдні варыянт і што змянілі

Спарткомплекс на Белуша выстаўлялі на грамадскія абмеркаванні год таму, у студзені 2022 года. Тады будынак комплексу павінна было ўключаць у сябе тры асноўных аб’ёму:

• гульнявая зала (змяшчальнасць — 2000 гледачоў) для правядзення матчаў чэмпіянатаў па міні-футболе, гандболе, валейболе і баскетболе;
• малая зала (змяшчальнасць — 500 гледачоў) для трэніровачных заняткаў і адборачных турніраў;
• лёгкаатлетычны манеж (змяшчальнасць — 1000 гледачоў) з 4 кругавымі бегавымі дарожкамі даўжынёй 200 м, 6 прамымі бегавымі дарожкамі на 110 м, сектарам для скачкоў у вышыню, скачкоў у вышыню з шастом, 2 сектараамі для скачкоў у даўжынюу, тэнісным кортам.

Самая істотная змена зараз — лёгкаатлетычны манеж на 1000 гледачоў замяніць на водна-тэрмальны блок з двума басейнамі.

Памяняўся і дызайн фасада і уваходнай групы. Стала больш вокнаў, уваход атрымаў ламаную форму, з’явіўся навес. Афармленне тэрыторыі перад спарткомплексам таксама змянілі: перад уваходам з’явілася вялікая пляцоўка, не занятая азеляненнем. А вось праходы да задняй часткі тэрыторыі сталі меншымі. З плана знік і прамы праезд паміж Скідзельскай шашой і Белуша.

Па плане відаць, што паркоўку вырашылі зрабіць большай і згрупаваць у адным месцы. Таксама перадумалі будаваць асобнае будынак гасцініцы для спартсменаў.

Што вырашылі на абмеркаванні год таму

Падчас абмеркавання ў гарвыканкам паступіла ўсяго два электронныя звароты ад фізічных асоб. Заўвагі тычыліся размяшчэння аб’екта в структуры горада. Аўтары прапаноўвалі перанесці запланаванае будаўніцтва на праспект Янкі Купалы насупраць Triniti. Гэта месца разглядалі для спарткомплексу ў 2020 годзе. Пазней там вырашылі будаваць новую клініческую бальницу.

У выніку горадабудаўнічы савет палічыў абмеркавання здзейсненымі і рэкамендаваў архітэктурна-планіровачную канцэпцыю для далейшага праектавання з улікам сваіх рэкамендацый. Месца будаўніцтва мяняць не сталі.

У кастрычніку 2022 года паведамлялі, што праектаванне аб’екта ўжо ідзе. Яно павінна было заняць 10−11 месяцаў. Пасля гэтага збіраліся пачаць будаўніцтва.

Раней пачаць будаўніцтва збіраліся ў 2022 годзе.

Навошта ў Гродна новы спарткомплекс

Будаўніцтва шматфункцыянальнага спартыўнага комплексу ў адпаведнасці з правіламі і патрабаваннямі міжнародных федэрацый дазволіць кратна палепшыць умовы для падрыхтоўкі гродзенскіх спартсменаў да чэмпіянатаў, першынстваў свету і Еўропы, адзначаюць аўтары праекта.

Раней ва ўпраўленні спорту і турызму падкрэслівалі важнасць спарткомплексу для Гродна: у адрозненне ад іншых абласных цэнтраў, тут не хапае вялікіх інфраструктурных спартыўных аб’ектаў, у тым ліку для правядзення спаборніцтваў па гульнявых відах спорту. Напрыклад, матчы чэмпіянату Беларусі па баскетболе ў Гродне праводзяць у дзвюх залах, дзе, да таго ж, глядацкія трыбуны займаюць зусім мала месца. Правесці ў іх больш сур’ёзныя турніры проста немагчыма, пад міжнародныя стандарты яны не падыходзяць.

Пры тым зараз праз санкцыі, звязаныя з палітычнай сітуацыяй у Беларусі і яе падтрымкай Расіі ў вайне супраць Украіны, у Беларусі не праходзяць міжнародныя еўрапейскія спаборніцтвы, а беларускім спартоўцам адмаўляюць ва ўдзеле ў такіх спаборніцтвах за мяжой. У планах упраўлення спорту Гродзенскай вобласці на 2023 год — рэспубліканскія чэмпіянаты, сярод мерапрыемстваў ёсць сумесныя з Расеяй спаборніцтвы.