У Гродне 1 лістапада затрымалі былога супрацоўніка «Гродна Азот». У Беларусі прайшлі вучэнні на выпадак беспарадкаў у калоніях і турмах. Гродзенец аспрэчвае пакаранне — яго асудзілі на прымусовае лячэнне і прастрэлілі нагу. Рэдакцыя Hrodna.life вывучыла, што адбылося ў вобласці з 31 кастрычніка па 6 лістапада.
Новыя экстрэмісцкія матэрыялы
Youtube-канал «Беларускае» і Telegram-канал «Беларускае» прызналі экстрэмісцкімі матэрыяламі па рашэнні суда Ленінскага раёна Гродна ад 27 кастрычніка 2022 года.
Курганскі Аляксандр, які адбыў пакаранне па «справе Зельцара», просіць не канфіскаваць яго маёмасць
Ён падаў заяву аб адмене мер забеспячэння грамадзянскага пазову — канфіскацыі маёмасці. Заяву разгледзяць у судзе 11 лістапада.
Затрыманні на «хіміі»
30 кастрычніка сілавікі правяралі тэлефоны ў палітвязняў у ПУАТ. Вядома пра затрыманні ў адзінаццаці ПУАТ у Магілёве, Асіповічах, Ваўкавыску, Віцебску, Шклове, Пружанах, Сушках, Мазыры, Гомелі, Крупках і Мінску. Затрыманні на «хіміі» звязаныя з рэгістрацыяй у плане «Перамога», паведаміў Рыгор Азаронак у сваім канале.
Пасля праверкі тэлефонаў на некаторых асуджаных склалі пратаколы па арт.19. 11 КаАП «Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць», паведамляе Telegram-канал «Суды, задержания. Гродно и область». Затрыманыя мінімум 22 палітвязняў, але прозвішчы вядомыя пакуль толькі шаснаццаці з іх, паведамляе «Вясна».
Вядома, што палітвязням з Ваўкавыскай ПУАТ-29 Дэвіду Шаракову, Арцёму Ляшнеўскаму прызначылі па 6 сутак адміністрацыйнага арышту, а Дзмітрыю Гурэеву — 20 базавых велічынь штрафу. Арышты палітвязні адбываюць ў ІЧУ Ваўкавыска.
Таксама суды прайшлі над Аляксандрам Сячко і Андрэем Разуваевым, але вынікі невядомыя. А 4 кастрычніка судзілі паводле арт.19.11 КаАП палітзняволеных Кацярыну Батуру і Алену Лысковіч, якія адбываюць тэрмін на гродзенскай «хіміі» — ПУАТ-25.
Новыя палітвязні ў вобласці
19-гадовая Аніта Бакуновіч — дзяўчыну затрымалі 21 верасня ў Гродна, з 24 верасня яна знаходзіцца ў СІЗА КДБ. Прычыны затрымання дагэтуль невядомыя — да Аніты ўвесь гэты час не пускаюць адваката.
Павел Клапаток — па ч. 1 арт. 368, ч. 2 арт. 367 і арт. 370 КК асуджаны да пазбаўлення волі на тэрмін тры гады ў папраўчай калоніі за абразу Лукашэнкі, паклёп на Лукашэнку, а таксама размяшчэнне лічбавага малюнка з спалучэннем чырвонага фону і свастыкі зялёнага колеру з арнаментам;
Аляксандр Ваўчок — па ч. 2 арт. 367 і ч. 1 арт. 368 КК прысуджаны да двух гадоў і шасці месяцаў пазбаўлення волі ў папраўчай калоніі за паклёп у дачыненні да Лукашэнкі і абразу Лукашэнкі;
Аляксандр Смолка — асуджаны па арт. 341 і арт. 368 КК за абразу Лукашэнкі і пратэстныя надпісы да аднаго года і шасці месяцаў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
Кацярына Батура — асуджаная па арт. 368 КК за абразу Лукашэнкі да аднаго году і шасці месяцаў абмежавання волі з накіраваннем у выпраўленчую ўстанову адкрытага тыпу, накіравана для адбывання пакарання.
Эдуард Ісаеў — асуджаны па арт. 367 і 368 КК за паклёп на Лукашэнку і абразу Лукашэнкі да трох гадоў і шасці месяцаў пазбаўлення волі ў папраўчай калоніі;
Валерый Тумілевіч узяты пад варту за абразу Лукашэнкі па арт. 368 КК;
Сяргей Ліцкевіч асуджаны да пазбаўлення волі за абразу Лукашэнкі, прадстаўніка ўлады, здзек з дзяржаўных сімвалаў па арт. 368, 369, 370 КК;
Павел Малітвік асуджаны за каментары ў сацыяльных сетках у дачыненні да супрацоўнікаў МУС па арт. 369 і 364 да двух гадоў пазбаўлення волі ў папраўчай калоніі;
Валерый Сівук асуджаны за паклёп і абразу Лукашэнкі па арт. 188 і ч. 1 арт. 368 КК да аднаго года і 6 месяцаў пазбаўлення волі ў папраўчай калоніі;
Уладзімір Шымчук асуджаны за абразу Лукашэнкі і здзек з дзяржаўных сімвалаў па ч. 1 арт. 368 і арт. 370 КК да аднаго года і 6 месяцаў пазбаўлення волі ў папраўчай калоніі,
Васіль Дземідовіч асуджаны за абразу прадстаўніка ўлады, суддзі, Лукашэнкі і выказванні ў сацыяльных сетках аб арганізацыі пратэсту да шасці гадоў пазбаўлення волі ў папраўчай калоніі.
У Беларусі затрымалі грамадзянку Літвы
Жанчына працуе ў адной з мінскіх школ. 16 і 23 жніўня 2020 года яна «прайшлася па горадзе» падчас мітынгаў. Таксама яна чытала «дэструктыўныя каналы», сказала жанчына.
Яна пераехала з Літвы ў Беларусь у 2011 годзе. Сілавікі сцвярджаюць, што жанчына «працягвала дэструктыўную дзейнасць у школе, дзе працавала настаўніцай», «цкавала дзяцей за палітычныя погляды і месца працы бацькоў». Затрыманая — настаўніца 173-й мінскай школы. Яе імя — Алена Генадзьеўна Цымбаліст. Жанчыне 58 гадоў, паведамляе «Вясна».
Два гады «хіміі» вынес суд гродзенцу за ўдзел у маршы пратэсту 2020 года
У судзе Кастрычніцкага раёна Гродна вынесены прысуд чарговаму ўдзельніку маршу пратэсту, які адбыўся 6 верасня 2020 года. Гродзенца Юрыя Курчэўскага абвінавацілі ў арганізацыі і падрыхтоўцы дзеянняў, якія груба парушаюць грамадскі парадак, або актыўным удзеле ў такіх дзеяннях па ч.1 арт. 342 КК. Справу разглядаў суддзя Дзмітрый Кедаль, паведамляе «Вясна».
На думку суда, Юрый прыняў актыўны ўдзел масавым вулічным шэсці, якое перашкаджала руху транспарту. У выніку аўтатранспартным прадпрыемству быў нанесены ўрон на суму 71,69 рублёў.
У Гродне 1 лістапада затрымалі былога супрацоўніка «Гродна Азот»
Пазней ён працаваў кіроўцам маршрутнага таксі. У 2020 годзе мужчыну затрымалі на мітынгу ў Гродне. У 2022 годзе яго затрымалі за тое, што ён размяшчаў абразлівыя каментары ў адрас супрацоўнікаў міліцыі.
Верагодна, мужчыне пагражае арт. 369 КК «Абраза прадстаўніка ўлады».
Хлопца клічуць Андрэй Чаромуха, паведамляе Telegram-канал «Суды, задержания. Гродно и область».
Палітвязню Паўлу Мажэйку, верагодна, працягнулі тэрмін утрымання пад вартай яшчэ на 2 месяцы
Здагадку выказала яго жонка Ірына Чарняўка, паколькі 1 лістапада Мажэйка не выйшаў на волю праз 2 месяца пасля затрымання.
Па словах Ірыны, лісты ад Паўла сям'і даходзяць. Паўлу ад сям'і яны таксама даходзяць, але ня ўсе.
Гродзенца другі раз асудзілі за абразу прадстаўніка ўлады
Аляксандра Сігіневіча асудзілі 5 кастрычніка ў судзе Маскоўскага раёна Брэста па арт. 369 КК «Абраза прадстаўніка ўлады». Прысуд — 2,5 гады «хатняй хіміі».
Паводле версіі следства, мужчына ў лістападзе 2020 года пакінуў каментар пад постам аб прапаршчыку міліцыі Ленінскага РАУС Брэста Дыяне Халабудзе ў Telegram-канале «Каратели Беларуси». У публікацыі сцвярджалася, што дзяўчына працуе канваірам, а падчас пратэстных акцый нясе службу як «ціхар».
Мужчына віну не прызнаў. Ён паведаміў, што хтосьці мог узяць яго тэлефон, пакуль Аляксандр быў у шпіталі і выходзіў з палаты, паведамляе «Берасцейская Вясна».
Дыяна Халабуда запатрабавала 1000 рублёў кампенсацыі маральнай шкоды — пасля публікацыі ў яе пагоршылася здароўе. Суддзя пастанавіла задаволіць пазоў.
Аляксандра ўжо судзілі па гэтым жа артыкуле ў судзе Ленінскага раёна Гродна — прызначылі 2 гады «хатняй хіміі». Ён паспеў адбыць паўгода пакарання. Адзін прысуд паглынуў іншы — Аляксандр адбудзе 2,5 года абмежавання волі.
У Гродне ліквідуюць ГА «Повелители Ночи». Яны праводзілі прабегі да 9 траўня і дапамагалі сіротам
Грамадскае аб’яднанне праіснавала чатыры гады. Яно зарэгістравана ў Мастах Гродзенскай вобласці. На 1 студзеня 2021 года ў аб’яднанне было 18 чалавек.
Сярод мерапрыемстваў, праведзеных у 2020 годзе — мотапрабег, прысвечаны святу 9 траўня, наведванне дамоў сямейнага тыпу, наведванне шматдзетных сем’яў і ў сацыяльна небяспечным становішчы. Заяўнік па справе аб ліквідацыі - Галоўнае ўпраўленне юстыцыі Гродзенскага аблвыканкама. Пасяджэнне пройдзе ў Гродзенскім абласным судзе 18 лістапада.
Фігурант «справы Ціханоўскага» з Гродна Уладзімір Кніга 4-ы месяц знаходзіцца ў ШІЗА
Пра гэта ў лісце распавёў Сяргей Ціханоўскі, паведамляе адзін з Telegram-каналаў.
«Не ведаю, на колькі мяне выпусцілі. Можа быць толькі, каб купіць туалетныя прыналежнасці і прывесці сябе ў парадак. Акрамя мяне ў жудасных умовах у розных установах утрымліваюцца і іншыя беларусы. Тут у Жодзіне ўжо больш за чатыры месяцы сядзіць у ШІЗА Уладзімір Кніга. Ён былы амапавец з Гродна, які заступіўся за мяне падчас затрымання ў 2020. Ён герой!», — піша Сяргей.
Уладзіміра Кнігу 2 чэрвеня 2021 года пакаралі чатырма гадамі пазбаўлення волі калоніі ўзмоцненага рэжыму. На той час ён ужо год адседзеў у СІЗА.
«Гродна Азот» хоча спагнаць урон з супрацоўніка
Пасяджэнне «аб кампенсацыі маёмаснай шкоды, прычыненай работнікамі пры выкананні службовых (працоўных) абавязкаў» прайшло 3 лістапада. Адказчык — Рыгор Рубан.
Рыгор Рубан — майстар па рамонту абсталявання цэха Аміяк-3. Яго затрымлівалі ў верасні 2022 года — верагодна, па справе незалежных прафсаюзаў. Мужчыну адпусцілі. Меркавана ён з’ехаў за мяжу.
Вынікі судовага паседжання невядомыя.
Суд у Ваўкавыску адправіў на «хімію» былога актывіста за здзек з дзяржаўнага сцяга
Суд Ваўкавыскага раёна вынес прысуд работніку ААТ «Беллакт», грамадскаму актывісту Юрыю Піваварчыку, якога абвінавацілі ў здзеку з дзяржаўных сімвалаў (арт.370 КК). Справу разглядаў суддзя Мікалай Сяргейка, паведамляе «Вясна».
З матэрыялаў абвінавачаньня вынікае, што Піваварчык ў суполцы «STOP LUKA», «размясціў малюнак дзяржаўнага сцяга на фоне нацысцкай сімволікі (свастыкі), сэнсавым зместам малюнка якога з’яўляецца аўтарскае меркаванне, што ў кіраванні Рэспублікі Беларусь выкарыстоўваецца нацысцкая ідэалогія, што непрымальна з пункту гледжання сучаснай культуры, паколькі ў ім прысутнічаюць элементы скажэння грамадска-палітычнай рэчаіснасці…».
У выніку, суддзя прызначыў Юрыю пакаранне ў выглядзе абмежавання волі з накіраваннем у папраўчую ўстанову адкрытага тыпу («хімія») тэрмінам на адзін год.
У Беларусі прайшлі вучэнні на выпадак беспарадкаў у калоніях і турмах
У Магілёўскай вобласці прайшоў тактыка-спецыяльны занятак па спыненні групавых непадпарадкаванняў і масавых беспарадкаў у папраўчай установе. У вучэннях прынялі ўдзел ваеннаслужачыя ўнутраных войскаў і супрацоўнікі Дэпартамента выканання пакаранняў МУС.
У ходзе мерапрыемства адпрацавалі дзеянні ўнутраных войскаў па лакалізацыі ўзброеных экстрэмістаў, вызваленні заложнікаў.
«Не выключаюцца спробы дэструктыўных сіл аднавіць пратэстную актыўнасць, у тым ліку з выкарыстаннем аб’ектаў папраўчай сістэмы», — падкрэсліў Мікалай Карпянкоў.
У Гродне затрымалі студэнта ГрДУ імя Янкі Купалы
Хлопец затрыманы за распаўсюд экстрэмісцкіх матэрыялаў (арт. 19.11 КаАП), распаўсюджванне свастыкі (ст. 19.10 КаАП) і адпраўку інфармацыі ў блог Ne*ta.
Мінчуку, якога асудзілі за пагрозу прапагандысту Прыдыбайла і распальванне варожасці да рускіх, узмацнілі пакаранне. У яго моцныя праблемы са здароўем
У судзе Кастрычніцкага раёна Гродна было разгледжана пытанне аб замене «хіміі» Святаславу Лепешаву, асуджанаму за «распальваючыя варожасць» каментары пра рускіх і тэлефонны званок з пагрозамі прапагандысту Прыдыбайла. Ягоную справу разглядаў суддзя Уладзімір Пазняк. Лепешаву ўзмацнілі рэжым і цяпер ён у турме чакае этапу ў калонію, паведамляе «Вясна».
У мужчыны пачаліся моцныя праблемы са здароўем. За час знаходжання ў папраўчай установе з-за цяжкай працы там, якая яму супрацьпаказаная, у яго пачаў падаць зрок. Лекары паставілі яму дыягназ — дыябетычная рэтынапатыя, пачалі лячэнне лазерам, але ў сувязі з узмацненнем рэжыму яго прыйшлося спыніць. Мужчыне можа пагражаць слепата і інваліднасць.
Гродзенец аспрэчвае пакаранне
У снежні 2020 года гродзенца з шызафрэніяй Валерыя Цюрына асудзілі на прымусовае лячэнне: летам 2020 года ён кідаўся з балкона бутэлькамі і патэльнямі.
Пры затрыманні пайшоў на АМАП з нажом — яму двойчы стрэлілі ў нагу. Пацярпелымі па справе прызналі трох амапаўцаў, а Цюрына абвінавацілі па арт.364 КК за гвалт у дачыненні да супрацоўніка органаў унутраных спраў.
Цяпер Валеры падаў у суд — 4 лістапада прайшло пасяджэнне «Аб змяненні прымусовых мер бяспекі і лячэння». Яго вынікі пакуль невядомыя.
У Гродне другі раз судзяць Анатоля Русецкага
Яго судзяць па арт. 369 — Абраза прадстаўніка ўлады.
Раней яго асудзілі на два гады «хатняй хіміі» ў судзе Першамайскага раёна Мінска. Паводле абвінавачвання, Анатоль Русецкі 29 кастрычніка 2020 года пакінуў каментар пад фота супрацоўніка міліцыі Аляксандра Краўчанкі ў Telegram-канале «Каратели Беларуси» з нецэнзурнай лексікай, чым публічна абразіў прадстаўніка ўлады, паведамляе «Вясна».
Спіс «экстрэмістаў» МУС папоўнілі 244 чалавек
Для гэтага на сайце нават з’явіўся другі дакумент — з другой часткай «экстрэмістаў». Цяпер у спісе 1714 чалавек.
Там ёсць і жыхары Гродзенскай вобласці.
У Гродне ліквідуюць грамадскую арганізацыю «Правапарадак»
Пасяджэнне аб ліквідацыі грамадскіх аб’яднанняў пройдзе 11 лістапада ў Гродзенскім абласным судзе. Заяўнік — Галоўнае ўпраўленне юстыцыі Гродзенскага аблвыканкама.
Арганізацыя працавала з 1995 года і размяшчалася на вул. Тэльмана, д. 9.
Затрымалі супрацоўніка фонду «Вяртанне» Сяргея Макарэвіча
Пра гэта паведамляе мецэнат Павел Падкарытаў. Раніцай 4 лістапада дома ў Макарэвіча адбыўся ператрус. Сяргей ІЧУ ў кастрычніку ў Гродне.
На волю выйшаў палітвязень Алег Фамін з Ваўкавыска
Ён адбываў свой тэрмін у шклоўскай папраўчай калоніі № 17, паведамляе «Вясна».
48-гадовы прадпрымальнік, трэнер па футболе з Ваўкавыска быў затрыманы 15 жніўня 2020 года і асуджаны суддзёй Мікалаем Талашкам на 2 гады і 6 месяцаў калоніі агульнага рэжыму па арт.364 КК (Гвалт альбо пагроза прымянення гвалту ў дачыненні да супрацоўніка органаў унутраных спраў). Таксама Алег павінен быў выплаціць пацярпеламу міліцыянту Вячаславу Іванову 2000 рублёў.
Па крымінальнай справе справе ў Падароску выставілі абвінавачванне
Дырэктару ПТУП «Маёнтак Падароск» Юрыю Меляшкевічу і фінансаваму дырэктару Дзмітрыю Карабачу выстаўленае абвінавачанне ў нясплаце падаткаў і страхавых узносаў з заробкаў працаўнікоў амаль на 400 000 рублёў, напісалі ў суполцы маёнтка. «Што, вядома, поўная хлусня», — пракаментавалі калегі затрыманых. Затрыманым пагражае да 12 гадоў пазбаўлення волі.
У Польшчы хочуць адмяніць «кавідны» закон аб аўтаматычным падаўжэнні візаў
Польскі ўрад плануе скасаваць аўтаматычны працяг дзеяння візаў і карт побыту (відаў на жыхарства). Адпаведны законапраект апублікавалі на сайце польскага ўрада.
Праект перадусім накіраваны на змены ў закон аб дапамозе грамадзянам Украіны, якія былі вымушаны пакінуць радзіму з-за вайсковай агрэсіі з боку Расіі. Але ў дакуменце ўзгадваюць і адмену аўтаматычнага працягу дзеяння візаў.
Пракуратура прыйшла ў дзіцячы садок у Слоніме: дашкольнікам расказалі пра вайну і патрыятызм
У Слоніме старэйшы памочнік пракурора Вольга Кузьма распавяла дзецям пра пракуратуру і гісторыю Беларусі. У канцы кастрычніка 2022 года яна наведала Слонімскі дашкольны цэнтр развіцця дзіцяці. Гэта не адзінкавы выпадак: пракуроры прыходзяць у дзіцячыя садкі ў розных гарадах, каб распавесці пра Вялікую айчынную вайну, генацыд беларускага народу і патрыятызм.
У Гродне затрымалі дзяржслужачага. На выбарах-2020 ён прагаласаваў за Ціханоўскую
Галоўны інспектар, дзяржслужачы з Гродзенскага абласнога ўпраўлення затрыманы ў Гродне. Пра гэта 2 лістапада паведаміў праўладны Telegram-канал. Мужчына распавёў на відэа, што размяшчаў экстрэмісцкую інфармацыю, а на выбарах у 2020 годзе прагаласаваў за Святлану Ціханоўскую.
Затрыманы — Алег Уладзіміравіч Сала, галоўны дзяржаўны інспектар працы аддзела нагляду за выкананнем заканадаўства аб працы Гродзенскага абласнога ўпраўлення Дэпартамента дзяржаўнай інспекцыі працы Міністэрства працы і сацыяльнай абароны.
Адвакатку Юлію Юргілевіч прызналі палітзняволенай. Упершыню назвалі артыкул, па якім яна праходзіць
Праваабарончая арганізацыя «Вясна» 1 лістапада прызнала палітзняволенай адвакатку з Гродна Юлію Юргілевіч. Таксама ўпершыню назвалі артыкул, па якім Юлію заключылі пад варту — 361−4 КК «Садзейнічанне экстрэмісцкай дзейнасці». Раней яго не разгалошвалі.
Да расследавання «генацыду беларускага народу» прыцягваюць студэнтаў і выкладчыкаў гродзенскага гістфака
Студэнты і выкладчыкі гістарычных спецыяльнасцей Гродзенскага дзяржаўнага універсітэта імя Янкі Купалы дапамагаюць пракуратуры збіраць інфармацыю аб генацыдзе беларускага народа. Ва ўніверсітэце з 2020 года працуе студэнцкая лабараторыя «Памяць Вялікай Айчыннай вайны». Для пракуратуры Гродзенскай вобласці студэнты і выкладчыкі апрацоўваюць інфармацыю аб людзях, якія праходзяць па шэрагу спраў сведкамі, ахвярамі і абвінавачанымі.
