За парушэнне правілаў перавозкі пасажыраў на месяц прыпыняць працу часткі маршрутак у Гродне. Рашэнне прынялі на пасяджэнні камісіі па арганізацыі гарадскіх аўтамабільных перавозак у Гродзенскім гарвыканкаме 14 траўня. Але знікнуць маршруткі не адразу, а тады, калі на іх будзе меншы попыт. Пра гэта Hrodna.life расказала крыніца ў Гродзенскім тралейбусным упраўленні, якое зараз выконвае функцыю аператара пасажырскіх перавозак.

Летам частка маршрутак у Гродне знікне. Улады абяцаюць, што гараджане гэтага не адчуюць
Маршрутка. Ілюстратыўнае фота

Што парушалі маршрутчыкі?

Праверкі маршрутных таксі паказалі, што некаторыя перавозчыкі не выдаюць пасажырам чэкі-квіткі. Іншыя парушаюць расклад руху.

«Калі ў 6 раніцы няшмат людзей едзе на працу, перавозчык можа не прыехаць, бо мала людзей. А калі пасажырапаток павялічваецца, то яны выходзяць на маршрут і працуюць, бо людзей больш», — расказала крыніца ў тралейбусным упраўленні. Яшчэ адно парушэнне: перавозка пасажыраў стоячы.

Гродзенцы не адчуюць скарачэння маршрутак

Працу часткі маршрутных таксі прыпыняць прыкладна з сярэдзіны чэрвеня да сярэдзіны ліпеня. Маўляў, камісія ў гарвыканкаме выбрала гэты час, бо летам павінна зменшыцца колькасць пасажыраў.

«Дзяцей не трэба будзе вазіць у школы, студэнты сыдуць на канікулы, хтосці паедзе ў адпачынак альбо на вёску. Пасажыраў стане меней», — сказала крыніца Hrodna.life.

Калі зараз інтэрвал чакання маршруткі ў сярэднім 12 хвілін, то з прыпыненнем працы некаторых перавозчыкаў ён можа павялічыцца да 15 хвілін.

Якіх канкрэтна перавозчыкаў і якія маршруты закранула прыпыненне дзейнасці, рэдакцыі Hrodna.life даведацца не ўдалося.

Хто адказвае за пасажырскія перавозкі ў Гродне

Функцыі аператара пасажырскіх перавозак у 2022 годзе Гродзенскі гарвыканкам перадаў Гродзенскаму тралейбуснаму ўпраўленню (раней існавала асобная ўстанова для гэтых функцый). Кантроль планавалі весці не толькі за пасажырамі, але і за кіроўцамі. Такім чынам планавалі выключыць парушэнні, якія выявілі падчас праверак у снежні 2021 года.

Таксама планавалася, што новы аператар пасажырскіх перавозак распрацуе варыянт дакладнага раскладу маршрутных таксі. Зараз дакладнага раскладу няма, маршруткі ходзяць у інтэрвале да 15 хвілін.

Чытайце таксама: В Гродно на всех остановках развесят камеры, чтобы контролировать маршрутчиков