Выстава "СКУЛЬПТУРА" 2 траўня. Фота: Hrodna.life
Адзін дзень у Гродне праіснавала выстава «СКУЛЬПТУРА». З 30 красавіка на ўваходзе ў галерэю напісана, што яна не працуе па тэхнічных прычынах. Раней з просьбай закрыць выставу да ўладаў звярнулася актывістка Вольга Бондарава. На яе думку, некаторыя мастакі, якія ўдзельнічаюць у ёй, вядомыя антыдзяржаўнымі выказваннямі.
У галерэі «400 квадратаў» у TRINITI 29 красавіка адкрылася выстава станковай скульптуры «СКУЛЬПТУРА». Яна павінна была працаваць да канца траўня. Але з 30 красавіка яе закрылі.
Гэта куратарскі праект аб’яднання секцыі скульптуры ГА «Беларускі саюз мастакоў». Групавая выстава павінна прадэманстраваць творчасць сталічных майстроў, сярод якіх як вядомыя прозвішчы, так і маладыя майстры.
Выстава такога роду дазваляе ўбачыць глыбінныя мастацкія працэсы, якія ідуць у нашай краіне, лічыць куратар праекта Іван Арцімовіч.
Ужо на наступны дзень, 30 красавіка, Telegram-канал «MAM: modern art museum» напісаў, што выставу пакуль нельга паглядзець. «Спадзяемся, часова», — напісалі аўтары.
«Пакуль сітуацыя не высветліцца, я б не хацеў даваць ніякіх каментароў для медыя», — адказаў Іван Арцімовіч на пытанні Hrodna.life.
PR-менеджэр ТАА «Трыніці Інвест» Алеся Матвёнак на званкі і запыты Hrodna.life пакуль не адказала. Рэдакцыя паўторыць іх пасля выхадных.
UPD 4 траўня. Алеся Матвеёнак паведаміла Hrodna.life, што на дадзены момант галерэя зачынена «па тэхнічных прычынах». На ўдакладняючыя пытанні яна не адказала, а наступныя званкі скінула. Начальнік аддзела культуры Гродзенскага гарвыканкама Дзяніс Чарняк адказаў, што «каментароў Hrodna.life не дае».
30 красавіка да начальніка аддзела культуры Гродзенскага гарвыканкама Дзяніса Чарняка з просьбай зняць выставу звярнулася актывістка Вольга Бондарава.
«Мабыць, іншых выстаў жыхары Гродна нявартыя, або ў аддзела культуры горада Гродна для гродзенцаў іншых мастакоў няма, а толькі упоратае змагар’ё, якое стварае не прыгажосць вакол сябе, а дэструктыўнае ўбоства. Таму што назваць прадметы самавыяўлення І. Арцімовіча мастацтвам мова не паварочваецца.
Але акрамя безумоўнага уродства, прывезенага ў Гродна, цікавасць уяўляе сама фігура Арцімовіча. Паведамляю Вам, паважаны Дзяніс Рыгоравіч, што І. Арцімовіч у жніўні 2020 года быў ініцыятарам збору подпісаў пад зваротам да прэзідэнта «Мастакі супраць гвалту» і сам першым пад дадзеным зваротам паставіў подпіс. Акрамя таго, на сваёй старонцы ў «Фэйсбук» Арцімовіч апублікаваў мноства матэрыялаў антыдзяржаўнага ўтрымання ў апраўданне ўдзельнікаў спробы дзяржаўнага перавароту, рэпосты экстрэмісцкіх каналаў і рэсурсаў, «Еўрарадыё», са зваротамі артыстаў супраць улады, Упраўлення культуры Гродзенскага аблвыканкама, а таксама І. М. Гедзіча, дырэктара Гродзенскага драмтэатра, выступленні экстрэміста Латушкі, а таксама «маральна згвалтаваных АМАПам, спецназам і прэзідэнтам «дзяржпераваротчыкаў».
30 красавіка Вольга адчыталася ў сваім Telegram-канале, што выстава закрыта.
Атрымаць каментар у Гродзенскім гарвыканкаме ў Hrodna.life не ўдалося — ён не працуе ў выходны дзень.
Чытайце таксама:
У самым цэнтры Гродна выставілі на продаж аднапакаёвую кватэру-малютку на Замкавай, 14. Усе яе вокны…
Каворкінг знаходзіцца ў гандлёва-забаўляльным цэнтры Triniti. Гэта шматфункцыянальная пляцоўка "К.І.Т.", у якой можна чытаць кнігі,…
Амаль 39 000 метраў гірляндаў і 280 000 лямпачак спатрэбіцца для ўпрыгожвання Гродна да навагодніх…
Гродзенцы паскардзіліся на недахоп артадонтаў у дзіцячай стаматалагічнай паліклініцы. Каб узяць талон да лекара, людзям…
З пачатку 2024 года ў Гродне крэміравалі 140 чалавек, тады як у 2020 годзе -…
Гродзенскія кавярні вырашылі аб’яднацца і дадаць на восень новыя гастранамічныя спалучэнні кававых напояў і дэсертаў.…