82 гектары лясоў і зон адпачынку ў Гродне чакае акарыцыдная апрацоўка. Яе будуць праводзіць з 9 траўня па 30 верасня. Перад апрацоўкай і пасля яе зоны абследуюць і пракантралююць. На гэта выдаткуюць 25 000 рублёў з гарадскога бюджэту.

Гродзенская гарадская жыллёва-камунальная гаспадарка да 28 красавіка праводзіць запыт цэнавых прапаноў.

Якія зоны чакае апрацоўка:

  • урочышча «Пышкі», у тым ліку лесапалосы ад вул. Каліноўскага ўздоўж вул. Вясенняй;
  • лесапарк «Румлёва» (сцежка здароўя);
  • урочышча «Ласосна»;
  • лясны масіў вул. Томіна (вул. Славінскага);
  • лясны масіў вул. Кабяка;
  • Каложскі парк;
  • парк Жылібера;
  • зона адпачынку Альшанка;
  • возера Юбілейнае;
  • лясны масіў вул. Волкава;
  • мікрараён Паўднёвы.

Дэзінсекцыю кляшчоў правядуць метадам абкурвання (фумігацыі). Выкарыстоўваць будуць інсектаакарыцыдны сродак «Цыпетрын» або аналаг. Апрацоўку тэрыторыі праводзяць за 3−5 дзён да наведвання яе людзьмі. Тэрмін дзеяння сродку складае ад 1 да 1,5 месяцаў.

У мінулыя гады падобную апрацоўку праводзіў Гродзенскі занальны цэнтр гігіены і эпідэміялогіі (ГЗЦГЭ).

Чым небяспечныя кляшчы?

Для абуджэння іксодавых кляшчоў дастаткова, каб слупок тэрмометра паказваў + 5 °C, паведамляе ГЗЦГЭ. Самая высокая актыўнасць кляшчоў - сярэдзіна траўня і чэрвень.

Іксодавыя кляшчы — захавальнікі ўзбуджальнікаў клешчавых інфекцый і іх пераносчыкі: клешчавога энцэфаліту, хваробы Лайма, чалавечага гранулацытарнага эрліхіёза і чалавечага монацытарнага эрліхіёза. Заразіцца імі можна пры прысмоктванні кляшча, раздаўліванні або расчэсванні месца прысмоктвання, трапленні змесціва ў вока.

У сезон 2021 года ў паліклінікі Гродзенскай вобласці звярнуліся 5372 пацярпелых ад укусаў кляшчоў, у тым ліку 1685 дзяцей (у 2020 годзе — 5807 зваротаў, у тым ліку 1874 дзіцяці).