Каля паркоўкі на Траецкай з нуля пабудуюць офісны будынак

Трохпавярховы будынак з падвалам і вальмавым (чатырохсхільным) дахам з’явіцца на 1-й Працоўнай, 8, піша Telegram-канал Urban Hrodna. Будынак узвядуць з нуля. Трэці паверх будзе мансардным.

Новы будынак грамадскага прызначэння хочуць пабудаваць паміж дамамі 6 і 10 (там размешчана піцэрыя «Форно» і кальянная «Штаб») па вуліцы 1-й Працоўнай. Габарытныя памеры будынка ў восях плануюць 7,5 м на 11,9 м.

На паверхах размесцяцца адміністрацыйныя памяшканні, у падвале — тэхнічныя. Да новага будынка падвядуць цеплавыя і электрычныя сеткі, вадаправод, каналізацыю. Прылеглую тэрыторыю добраўпарадкуюць: у планах азеляненне і паркоўка, пракладуць дарожкі.

Паводле альтэрнатыўнага варыянта планавання новы будынак прапануюць абсталяваць міні-кацельняй і як паліва выкарыстоўваць біямасу. Заказчык планаванай дзейнасці - ТАА «ІзалТрэйд».

Архітэктурнае аблічча будынка павінны ўвязаць з прылеглай гістарычнай забудовай. Надзел пад будынак плошчай 0,0215 га размешчаны ў межах зонаў аховы нерухомых матэрыяльных гісторыка-культурных каштоўнасцяў.

Зараз рыхтуюць справаздачу аб ацэнцы ўплыву будаўніцтва на навакольнае асяроддзе (АУНА). Яго падрыхтуюць да 28 красавіка. З 6 красавіка па 7 чэрвеня правядуць сход з абмеркаваннем справаздачы аб АУНА. З 8 чэрвеня па 9 ліпеня ўсю дакументацыю па праекце дашлюць на дзяржаўную экалагічную экспертызу. Рашэнне наконт будаўніцтва прымуць да 19 жніўня.

Як забудоўваюць ўчастак паміж Працоўнай і Вялікай Траецкай

Паблізу нядаўна завяршылі будаўніцтва новага гандлёва-офіснага будынка па Вялікай Траецкай, 37. Інвестар планаваў у яго размяшчэнне ў тым ліку выставачнай залы. У канцы сакавіка там адкрылася кавярня «Цяпло», з сярэдзіны красавіка мусіць запрацаваць бар «Punkroll». Стары дуб у цэнтры двара будаўнікі захавалі.

Сучасны будынак грамадскага прызначэння з’явіўся і на 1-й Працоўнай, 2. У ім планавалі размясціць грамадскае харчаванне і офісы. Дрэвы на надзеле таксама змаглі захаваць і ўпісаць у будынак.

Што будзе з паркоўкай?

Праект дэталёвага планавання цэнтра Гродна, заснаваны на Генплане развіцця горада да 2030 года, прадугледжваў будаўніцтва двухпавярховага паркінга на месцы паркоўкі на Вялікай Траецкай (1-й Працоўнай). Такім чынам прапаноўвалі кампенсаваць запланаванае памяншэнне паркоўкі каля сінагогі.

Гродзенскія гісторыкі звярнуліся да чыноўнікаў з прапановай арганізаваць там не паркінг, а сквер-скансен. Справа ў тым, што на тэрыторыі сучаснай стаянкі фактычна да пачатку XIX ст. функцыянавалі старыя яўрэйскія могілкі. У часы Другой сусветнай вайны там хавалі памерлых вязняў гродзенскага гета № 1. Аўтастаянка і туалет з’явіліся на іх месцы ў савецкі час.

Гарвыканкам пераслаў прапановы распрацоўнікам. Акрамя таго, на пасяджэнні архітэктурна-горадабудаўнічага савета прыйшлі да высновы, што шматузроўневы паркінг на Вялікай Траецкай мэтазгодна не будаваць.