“Кібер-Партызаны” Беларусі 19 верасня апублікавалі мапу з адрасамі людзей, што скардзіліся ў міліцыю. Сцвярджаецца, што гэта звесткі з базы выклікаў службы 102. Партызаны адзначылі толькі тыя выклікі, што тычыліся скаргаў на развешаную БЧБ-сімволіку, на пратэстоўцаў і кіроўцаў аўтамабіляў, якія сігналілі. Hrodna.Life прааналізавала даносы жыхароў Гродна і сабрала самыя распаўсюджаныя і самыя нестандартныя скаргі.
Кастрычніцкі раён скардзіўся актыўней за Ленінскі
Агулам па Гродне ў базе захоўваецца 166 кантактных дадзеных грамадзян, што звярталіся з палітычна-матываванымі скаргамі. У Кастрычніцкім раёне скардзілася 86 гродзенцаў. У Ленінскім – 80.
Што не падабалася “неабыякавым” гродзенцам
- Гукавыя сігналы аўтамабіляў;
- Расфарбаваныя ў бел-чырвона-белыя колеры лаўкі, платы і дрэвы;
- Выгукі “Сыходзь!” і “Жыве Беларусь!”;
- Расквідванне па паштовых скрынях і расклейванне лістовак;
- Развешванне сцягоў на дрэвах, громаадводах і балконах;
Сярод скаргаў патрапляюцца і арыгінальныя.
Адной з жанчын “Нагрубіў невядомы хлопец, які ішоў па вуліцы з амерыканскім сцягам”.
Другая жанчына скарділася, што “На прыпынку каля рэстарацыі “Туран” у бок Славінскага ў суполцы грамадзянаў, апранутых у працоўную форму “Гродна-Азот”, знаходзіцца мужчына які размаўляе з украінскім акцэнтам”.
Гродзенскія праваслаўныя цэрквы таксама былі незадаволены
У службу 102 паступалі сігналы з гродзенскіх праваслаўных храмаў. У прыходзе храма усекнавення главы Іаана Прадцечы на вуліцы Курчатава былі незадаволеныя тым, што 15 лістапада ўздож плота выставілі лампадкі.
У манастыры Свята-Раства Багародзіцы на вуліцы Давыда Гарадзенскага, 23 жніўня, скардзіліся на тое, што “Каля палаца тэкстыльшчыкаў другі тыдзень, у доме на супраць манастырскага кіёска, на 3 паверсе, з балкона вісіць бел-чырвона-белы сцяг”.
