У памяшканні на Кірава,3 ад 17 верасня распачала працу “Выстава ў вокнах” – “Суіснаванне”. Убачыць працы мастака Віталя Палякова можна ў панарамных вокнах крамы “Адметнасць” да 27 верасня.
Віталь Палякоў – навучэнец Акадэміі мастацтваў у Варшаве. У 2021 годзе тэмай яго навучальнага праекта было “Суіснаванне”. Мастак раскрываў тэму суіснавання прыроднага свету з чалавекам. Выстава атрымалася пра тое, што чалавек знішчае навакольны свет, хоць мы павінны суіснаваць разам.
Яшчэ адна грань “Суіснавання” – адносіны паміж блізкімі людзьмі.
“ [Гэта] у сувязі з тым, што сёлета мы пачалі суіснаваць яшчэ і з нашым сынам. Віталь маляваў яго, крыху мяне, а таксама нашага сабаку, ката і прыроду навокал. У Гродне Віталь прадставіў толькі частку працаў. Усе яны зроблены тушам на паперы”, – распавяла Hrodna.Life жонка масткака, Ганна Паўлоўская.
Выстава будзе працаваць з 17 па 27 верасня. Пазней яе пакажуць у Варшаве.
