“Лета 2021-Апошняе для ВелаГродна”, – напісалі прадстаўнікі грамадскага аб’яднання раварыстаў Гродна на сваёй старонцы ў Facebook. Гродзенскі аблвыканкам падаў пазоў аб ліквідацыі арганізацыі. Фармальна – праз памылкі ў дакументах. “Калі мы і наша дзейнасць не патрэбна прадстаўнікам гарадской улады, навошта працягваць нешта рабіць?”- кажа прадстаўніца “ВелаГродна” Юлія Каляда.

Аб’яднанне існуе з 2013 года. Яго мэта – рабіць горад зручней для раварыстаў і развіваць веларух. У сярэдзіне ліпеня 2021 года ўпраўленне юстыцыі Гродзенскага аблвыканкама пачало праверку ў дачыненні да “ВелаГродна”. Па яе выніках аблвыканкам падаў у суд іскавую заяву аб ліквідацыі. Афіцыйная прычына – парушэнні і памылкі ў дакументаабароце, якія ў пазове занялі тры старонкі.

“Выправіць памылкі Упраўленне юстыцыі нам не дала. Акт аб выяўленых парушэннях адразу быў накіраваны ў суд, і мы даведаліся пра іх ужо з суда”, – распавяла Hrodna.life сябра праўлення “ВелаГродна” Юлія Каляда. Першае судовае пасяджэнне па ліквідацыі прызначылі на 30 жніўня ў Гродзенскім абласным судзе.

“Калі мы не патрэбныя, навошта працягваць нешта рабіць?”

Надзеі, што суд адмовіць у ліквідацыі, няма, лічыць Юлія. “Час такі. З аднаго боку трэба [аспрэчваць рашэнне аб ліквідацыі], з другога боку на гэта патрэбныя сілы, час, юрысты, грошы. Незразумела, ці трэба за гэта брацца, калі вынік і так вядомы”, – распавяла яна Hrodna.life.

Нейкіх незавершаных буйных праектаў у арганізацыі цяпер няма, таму няма і неабходнасці адцягваць працэс. 

У тым, каб зараз шукаць іншыя юрыдычныя формы, Юлія не бачыць сэнсу. “Калі мы і наша дзейнасць не патрэбна прадстаўнікам гарадской улады, аблвыканкаму – навошта мне нешта працягваць рабіць? Катацца на ровары мы можам і без арганізацыі. Але хто будзе адстойваць правы раварыстаў у плане інфраструктуры, безбар’ернага асяроддзя? Спадзяюся, што ўсе зародкі, якія мы ўклалі за час нашага існавання, будуць даваць парасткі. Мы і сёлета паспелі падаць чарговы спіс на паніжэнне бардзюраў”. 

Чытайце таксама:

• Без сотрудничества ничего не получится. Как «ВелоГродно» делает наш город лучше
• Не только инфраструктура. Пять достижений «ВелоГродно» за пять лет

Задача арганізацыі была не проста праводзіць мерапрыемствы, катацца на роварах, а грунтоўна ўплываць на тое, каб горад стаў зручным для раварыстаў, распавяла прадстаўніца “ВелаГродна”.

“На наш погляд, без нас гэта было б складана зрабіць. Калі цяпер ужо горад, вобласць лічаць, што без такіх арганізацый, як мы, можна працягваць рухацца ў гэтым кірунку – калі ласка, няхай рухаюцца”.

Паміж раварыстамі і чыноўнікамі. Навошта гораду”ВелаГродна”

Аб’яднанне “ВелаГродна” займаецца папулярызацыяй ровара як экалагічнага віду транспарту, сродку актыўнага адпачынку і фарміравання здаровага ладу жыцця. “ВелаГродна” актыўна супрацоўнічала з мясцовай уладай па пытаннях развіцця велаінфраструктуры і трымала зваротную сувязь з гродзенскімі веласіпедыстамі. З 2018 года “ВелаГродна” уваходзіць у склад Гродзенскага гарадскога Каардынацыйнага савета па турызме, з 2017 – у склад Савета па забеспячэнні сістэмы веласіпеднага руху пры гарвыканкаме, з сакавіка 2016 – у склад грамадскага каардынацыйнага экалагічнага савета пры Гродзенскім абласным камітэце прыродных рэсурсаў і аховы навакольнага асяроддзя.

Гэта шмат у чым дзякуючы “ВелаГродна” ў Гродне прыніжалі бардзюры, стваралі веларазметку і веладарожкі, велапаркоўкі каля грамадска-значных устаноў, будавалі велагаражы ў жылых раёнах і ўсталёўвалі веламаячкі-стэнды для самастойнага рамонту ровараў. Арганізацыя працавала над уключэннем турыстычных веламаршрутаў Гродзенскай вобласці ў сістэму еўрапейскіх веламаршрутаў, магчымасцямі перавозкі ровараў у грамадскім і міжгароднім транспарце, развіццём аматарскага і экстрэмальных відаў веласпорту.

Чытайце таксама:

• «Заставляю чиновников ходить пешком». Мечислав Гой дал откровенное интервью
• Город — для пешеходов и велосипедистов. В Гродно пройдет Европейская неделя мобильности

“ВелаГродна” займалася арганізацыяй гарадскіх велапрабегаў, экалагічных акцый, дзіцячых велазаездаў, веламарафона “Суседзі” ў партнёрстве з гродзенскім райвыканкамам. Сярод праектаў “ВелаГродна”- велашкола для пачаткоўцаў, дзе дарослыя і дзеці маглі навучыцца ездзіць на ровары. 

У 2019 годзе Юлія Каляда як прадстаўніца “ВелаГродна” распрацавала “Канцэпцыю развіцця гарадскога веласіпеднага руху ў Гродне да 2030 г.” у рамках праекта “Гарадскі веларух у Беларусі”. Дакумент зацвердзіў намеснік старшыні Гродзенскага гарвыканкама Андрэй Жук. 

Чытайце таксама:

• Литва открылась с другой стороны: 333 км по соседней стране с «ВелоГродно»
• Яблоко, улыбка и хорошее настроение. 100 гродненцев на велосипедах получили утренние подарки от ВелоГродно

Таксама сярод партнёраў і кансультантаў арганізацыі – экалагічнае таварыства “Зялёная сетка”, Мінскае роварнае таварыства і Цэнтр экалагічных рашэнняў. Апошні ў сваёй дзейнасці актыўна супрацоўнічаў з дзяржорганамі па пытаннях экалогіі і таксама быў ліквідаваны па рашэнні Мінскага гарвыканкама ў ліпені 2021 года.

Хто яшчэ выявіўся лішнім у Гродне

З пачатку 2021 года Гродзенскі гарвыканкам ужо ліквідаваў 60 суб’ектаў гаспадарання, у той час як за ўвесь 2020 – 66, у 2019 – 55. Праўда, да ліпеня 2021 года ў асноўным гэта былі камерцыйныя арганізацыі. У ліпені ж Гродзенскі гарвыканкам ліквідаваў: 

• культурна-асветніцкая ўстанова “Гродненский рок-клуб“, 
• даследча-аналітычнае ўстанова “Стратегия-Северо-Запад”,
• сацыяльна-інфармацыйная ўстанова “Новые горизонты истины”,
• сацыяльна-дабрачынная ўстанова “Цифровая экономика для НКО”,
• культурна-асветніцкая ўстанова “Центр отдыха и развития “Портал”,
• ўстанова па развіцці грамадска-сацыяльнага партнёрства “Гражданская взаимопомощь”,
• сацыяльна-адукацыйная ўстанова “Центр личностного развития женщин”,
• прыватная ўстанова “Центр дополнительного образования взрослых “Студия полезных компетенций”,
• прыватная асветніцкая ўстанова “Европейская молодёжная предпринимательская инициатива”.

11 жніўня прайшло падрыхтоўчае паседжанне па ліквідацыі ТАА “Гродна Лайф Медыя”, уласніка сайта Hrodna.life. Пазоў у суд падала Гродзенская пракуратура. Асноўнае пасяджэнне прызначылі на 26 жніўня. Таксама Галоўнае ўпраўленне юстыцыі Гродзенскага аблвыканкама накіравала ў суд заяву аб ліквідацыі Гродзенскага дзіцячага хоспіса. Аб гэтым 14 жніўня паведаміла дырэктарка хоспіса Вольга Вялічка.

Ліквідацыі адбываюцца па ўсёй краіне

Працэс ліквідацыі недзяржаўных устаноў і грамадскіх арганізацый у Беларусі актыўна ідзе з ліпеня 2021 года. 23 ліпеня стала вядома, што Мінюст Беларусі ліквідуе каля 50 арганізацый. Ліквідацыі працягнуліся і потым. 

“Так і ўрад і МЗС пабеглі за “дэмакратыяй” і пастваралі ў нас (хай Макей зноў не ўспрыме на свой рахунак, гэта і да яго яшчэ было, яму гэта ў спадчыну дасталася, трэба цяпер разграбаць), і мы атрымалі пад дзве тысячы на невялікую краіну НДА, НКА, бандытаў і замежных агентаў. Ну і што, дэмакратыю атрымалі?”, – выказаўся Аляксандр Лукашэнка на нарадзе 22 ліпеня.