У Гродне 21 чэрвеня быў пабіты тэмпературны рэкорд. Паветра прагрэлася да 31,6 градусаў. Папярэдні рэкорд — 30,2 градуса быў зафіксаваны ў 1975 годзе. Hrodna. life даведаўся, як гродзенцы рэагуюць на спёку.

Самыя папулярныя напоі ў гродзенскіх кавярнях апошнія два тыдні - «эспрэса-тонік» і «айс-латэ». Продаж гэтых напояў вырас у пяць разоў, распавялі Hrodna.life у кавярні «Віленская». Акрамя кавы, кожная кавярня прапануе ліманад. «Гэта сезонны напой, які выпіваюць амаль адразу», — расказала барыста Алла.

Тэмпература б’е рэкорды. Як гродзенцы ратуюцца ад спёкі
Кавярня «Віленская». Фота: Hrodna. life

«Халодная кава самая папулярная. Гэта „эспрэса-тонік“, плюс у нас ёсць фірмовы „эспрэса-тонік“ з базілікавым сіропам уласнага прыгатавання. Таксама карыстаецца папулярнасцю „айс-латэ“ і „бамбл“. „Бамбл“ гэта эспрэса плюс апельсінавы сок і карамельны сіроп. Усе ліманады ў нас створаны на сіропах уласнага прыгатавання. Гэта абляпіха, базілік і чорныя парэчкі», — распавёў Hrodna.life уласнік кавярняў «Sprava» і «Наша кава» Дзмітрый Захарка.

У некаторых месцах можна знайсці марозіва. У «Leone House» і «Джезва» часцей за ўсё купляюць ягаднае з кіслінкай.

Тэмпература б’е рэкорды. Як гродзенцы ратуюцца ад спёкі
Летняе меню ў кавярні «Sprava». Фота: Hrodna. life

Як перамагаюць спёку кіроўцы?

Няпроста пераносіць такую тэмпературу кіроўцам грамадскага транспарта. Hrodna.life даведаўся, ці падрыхтаваліся да такога надвор’я ў Гродзенскім тралейбусным упраўленні.

«Усе тралейбусы парка забяспечаны вентылятарамі ў кабінах кіроўцы. Перад пачаткам летняга сезону мы яшчэ дадаткова закупілі вентылятары. Пакуль выпадкаў перагрэваў не было. Штораніцу кіроўцы праходзяць медагляд у фельчара. Калі ёсць нейкія падазрэнні, то мы не рызыкуем і не выпускаем на маршрут. Таксама ў нас усталяваны спецыяльны апарат, дзе кіроўцы маюць магчымасць набраць з сабой вады» — распавёў Hrodna.life дырэктар Гродзенскага тралейбуснага ўпраўлення Віктар Шарэйка.

Тэмпература б’е рэкорды. Як гродзенцы ратуюцца ад спёкі
Гродзенскі тралейбус. Фота: Hrodna. life

Пляжы пакуль працуюць

Гараджане ад спёкі ў асноўным ратуюцца на вадаёмах. У Гродне чатыры дазволеныя зоны для купання (возера Юбілейнае, пляжы на Нёмане ў раёне Ласосна, Пышкоў і цэнтральны пляж каля Старага маста — Hrodna.life). З пачатку купальнага сезону спецыялісты манітораць якасць вады. Пакуль што яна паўсюль адпавядае нормам. Але, калі тэмпература паветра не знізіцца, да канца тыдня з-за спёкі і массавага наплыву паказальнікі могуць змяніцца, паведамляе «Гродно Плюс».

Колькі чалавек у Гродне за апошнія дні звярнулася па дапамогу ўрачоў у сувязі з перагрэвам, даведацца не ўдалося. У Бальніцы хуткай медычнай дапамогі рэдакцыі Hrodna.life параілі звярнуцца да іх з пісьмовым зваротам.