Беларускія самалёты не змогуць лётаць праз краіны Еўрасаюза і ва Украіну. Гэта перашкодзіць турыстам трапіць у самыя папулярныя курортныя накірункі. Праз гэта 25 траўня цэлы дзень амаль немагчыма датэлефанавацца ў «Белавія». Не валодаюць інфармацыяй і турфірмы.
У 2021 годзе самыя папулярныя накірункі для адпачынку на моры сярод беларусаў: Турцыя, Егіпет, Туніс, Албанія, Чарнагорыя, Балгарыя, Грэцыя і Кіпр, распавяла экспертка Лілія Кобзік, рэдактарка сайта Рэспубліканскага союза турыстычных арганізацый. У большасць гэтых краін трэба ляцець праз паветраную прастору Еўрасаюза. У Турцыю можна патрапіць, зрабіўшы кола праз Расію, але гэта павялічыць цэны білетаў.
На саміце ЕС 24 траўня дэпутаты Еўрапарламента вырашылі забараніць палёты ў краіны Еўрасаюза самалётаў беларускіх кампаній. Гэта рашэнне павінны яшчэ зацвердзіць міністры краін ЕС — гэта можа здарыцца ўжо ў чэрвені. Украіна таксама паведаміла аб спыненні авіязносінаў з Беларуссю з 26 траўня.
З-за вялікай колькасці званкоў ад кліентаў у турфірме «Ростинг» не змаглі адказаць рэдакцыі Hrodna.lifе. У турфірме «Дон Кихот» пакуль не ведаюць, як забароны паўплываюць на працу, бо афіцыйныя паперы і распараджэнні пакуль адсутнічаюць. Але пацвердзілі, што на летні перыяд у паўднёвыя краіны было забранавана шмат тураў.
Большасць гродзенскіх фірмаў прапаноўвала на гэты сезон адпачынак у Албаніі і Чарнагорыі. Яны карысталіся папулярнасцю, бо ў гэтыя краіны не патрэбныя візы і ПЦР-тэсты. Акрамя таго, Албанію з пачатку траўня выключылі з «чырвонай зоны» і пасля вяртання з яе самаізаляцыя перастала быць абавязковай. Адкрытымі для турыстаў заставаліся Турцыя і Егіпет.
Куды можна было паляцець з Гродна?
У 2019 годзе з Гродна можна было паляцець на адпачынак у Турцыю, Егіпет, Балгарыю, Туніс і Чарнагорыю. У 2020 годзе вылеты, праз каранавірус, распачаліся толькі ў сярэдзіне ліпеня і толькі ў Турцыю і Егіпет. Адначасова з мінскага аэрапорта можна было патрапіць у Чарнагорыю і Албанію.
У сезоне 2021 палёты ў Егіпет з Гродна пачаліся з 27 красавіка, планаваліся палёты ў Балгарыю.
«Белавію» чакаюць скарачэнні?
Euroradio апублікавала дакумент, згодна з якім «Белавіа» плануе скараціць колькасць супрацоўнікаў і зменшыць выдаткі. У прэс-службе «Белавіі» не пацвердзілі, што дакумент сапраўдны, але і не абверглі: «Я разумею, пра што вы кажаце. Калі ў нас будзе які-небудзь каментар, мы вам ператэлефануем».
