Юзаф Нямера з блізкімі ля будынка Гродзенскага абласнога суда пасля вынясення прысуду. Фота: Алена Кавальчук
У Гродзенскім абласным судзе 13 траўня перагледзелі крымінальную справу Юзэфа Нямеры. Яго раней асудзілі на 2,5 гады «хатняй хіміі» за пінок у сцягно амапаўцу і ўдзел у акцыі пратэсту. З прысудам не пагадзіліся і абвінавачаны, і дзяржабвінаваўца.
Судовая калегія ў складзе суддзяў Кулеша, Бубенчыка і Рачынскага прызначыла Юзафу Нямеры новае пакаранне — 1,5 гады пазбаўлення волі ў калоніі агульнага рэжыму.
Юзэфа Нямера 12 лістапада 2020 асудзілі за ўдзел у беспарадках і гвалт над міліцыянтам. Абараняючы дзяўчыну падчас акцыі пратэсту 6 верасня, ён штурхнуў у сцягно амапаўца і ўцёк. 14 студзеня 2021 гады Гродзенскі абласны суд пакінуў у сіле прысуд — 2,5 года «хатняй хіміі». Прысуд абскардзілі старшыні абласнога суда, які прызначыў новы разгляд.
Пацярпелы амапавец Павел Снацкі, які выступаў у судзе Кастрычніцкага раёна за шырмай і пад змененым імем, на пасяджэнне 13 траўня не з’явіўся.
Абаронца папрасіў далучыць да справы ганаровыя граматы, якімі ўзнагароджвалі Юзэфа Нямеру за ўдзел у грамадскім жыцці.
Дзяржабвінаваўца на пасяджэнні 13 траўня паведаміў, што змене падлягае прысуд у частцы арт. 364 КК- Гвалт у дачыненні да супрацоўніка УУС. У якасці канчатковага пакарання ён запытаў два гады пазбаўлення волі ў калоніі агульнага рэжыму.
Юзэф Немер падкрэсліў, што акцыя была мірнай. «Гэтыя абвінавачванні ў мой адрас, што я прыйшоў са злачынным намерам, не адпавядаюць рэчаіснасці. Не было ў мяне злачыннага намеру», — сказаў Нямера і зноў распавёў, што адбывалася 6 верасня 2020 года.
У 14.00 6 верасня ў цэнтры Гродна быў запланаваны чарговы марш нязгодных з дзеяннямі ўладаў гараджан. Пратэстоўцы збіраліся ў шасці кропках горада, каб дайсці на Савецкую плошчу. Сілавікі блакавалі дарогі і разбівалі натоўпы, але людзі ўсё ж сабраліся ў цэнтры і пайшлі ў бок Вішняўца. Яны ішлі па праезнай частцы Старога моста, каля завода «Белкард» і аўтобуснага парка. Каля ўніверсама «Брэст» іх сустрэў АМАП, які ішоў з усіх бакоў. Адбыліся жорсткія затрыманні, пры якіх і мужчын, і жанчын душылі, цягнулі па асфальце і распылялі газ.
Юзэф настойвае: убачыўшы гвалт, ён дзейнічаў ненаўмысна, «нага спрацавала хутчэй за галаву». Ён адзначыў, што ў судзе пацярпелы прасіў яго строга не караць.
14 студзеня пасля абскарджання прысуд уступіў у сілу. 23 студзеня Нямера ўстаў на ўлік у Дэпартаменце выканання пакаранняў. Зараз Юзэф адбыў ужо больш за сем месяцаў абмежавання волі. Парушэнняў у яго не было — яго праверылі 57 разоў. 500 рублёў кампенсацыі маральнай шкоды пацярпеламу ён выплаціў. У Юзэфа 90-гадовая мама, якую ён даглядае разам з сястрой.
Абаронца лічыць, што крымінальную справу па арт. 342 КК варта спыніць. На думку адваката, віна Юзэфа ва ўдзеле ў групавых дзеяннях, якія груба парушаюць грамадскі парадак, не даказаная. Юзэф сапраўды выходзіў на праезную частку, але ішоў у сярэдзіне і не быў у першых шэрагах.
Узмацненне жорсткасці пакарання, на думку адваката, будзе празмерным. Ён папрасіў суд не задавальняць апеляцыйны пратэст і задаволіць скаргу Юзэфа.
Чытайце таксама:
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…