Эпідэміёлагі: брытанскага штаму COVID-19 у Гродне няма — няма лабараторый для яго вызначэння

Захворванне COVID-19 у Гродне і вобласці зніжаецца, распавялі Hrodna.life у Гродзенскім занальным ЦГЭ. У траўні 2021 года горад можа вярнуцца да нармальнага жыцця, а пакуль адмяняць нашэнне масак і дэзінфекцыю рана. Аснашчанасць лабараторый ў Гродна не дазваляе вызначыць брытанскі штам каранавіруса. Вось што яшчэ карэспандэнт Hrodna.life змагла даведацца ў спецыялістаў.

За тыдзень з 11 па 17 студзеня эпідэміялагічная сітуацыя пагоршылася, адзначала загадчыца аддзела эпідэміялогіі Гродзенскага занальнага цэнтра гігіены і эпідэміялогіі (ЦГЭ) Святлана Кісель у газеце «Перспектива». Але канкрэтных лічбаў яна не назвала. Дадзеныя аб колькасці захварэлых каронавірусам у Гродне не публікавалі з 24 красавіка 2020 года. На пытанне аб тым, чаму канкрэтныя лічбы не публікуюць, у ЦГЭ Hrodna.life адказаць не змаглі.

У Гродзенскім занальным ЦГЭ адмовіліся гаварыць з Hrodna.life. Таму карэспандэнт Hrodna.life патэлефанавала па тэлефоне прамой лініі, якую праводзіла 28 студзеня Ірына Тупік, намеснік галоўнага ўрача па эпідэміялогіі Гродзенскага занальнага ЦГЭ.

Між тым, цяпер колькасць захворванняў зніжаецца, сцвярджаюць у Гродзенскім занальным ЦГЭ. Спецыялісты рыхтуюцца да нармалізацыі сітуацыі ў маі, але дадаюць, што нягледзячы на вопыт, дакладна спрагназаваць паводзіны віруса немагчыма.

Брытанскага штаму каранавірусу ў Гродна не выявілі - няма лабараторый патрэбнага ўзроўню для яго вызначэння, распавялі Hrodna.life у Гродзенскім занальным ЦГЭ. Звестак пра яго няма на сайце Міністэрства аховы здароўя і ў ягоных афіцыйных дакументах.

Дзеці хварэюць бессімптомна, дарослыя — з пнеўманіяй

Эпідэміёлагі заяўляюць, што ў Гродне можна казаць аб сфармаваным калектыўным імунітэце да COVID-19. Ён таксама акажа ўплыў на зніжэнне захворвання. Па словах эпідэміёлагаў, было досыць шмат выпадкаў, калі гродзенцы перахварэлі бессімптомна — сярод іх вялікі працэнт дзяцей і моладзі. Дакладных лічбаў Hrodna.life не далі. Таксама дапаможа вакцынацыя — гродзенцы паступова запісваюцца на прышчэпку.

У 66,9% выпадкаў каранавірус клінічна выяўлены — вострай рэспіраторнай інфекцыяй або пнеўманіяй. Часцей за ўсё хварэе дарослае працаздольнае насельніцтва. У 87,6% - гэта гродзенцы ва ўзросце 30−59 гадоў, згадвала Святлана Кісель з ЦГЭ ў газеце «Перспектива».

Маскі і дэзінфекцыя спрацавалі

Эпідэміёлагі перакананыя, што стрымаць эпідэмію дапамаглі прафілактычныя меры — выкарыстанне масак і дэзінфекцыі, дыстанцыяванне, мінімізацыя кантактаў. Ключавую ролю ў зніжэнні распаўсюджвання COVID-19 эпідэміёлагі адводзяць маскам.

Кіраўнікі арганізацый павінны забяспечыць наяўнасць масак і антысептыкаў у сваіх арганізацыях, кантраляваць здароўе супрацоўнікаў, забяспечыць дыстанцыяванне, праводзіць уборку і праветрыванне. Поўны спіс можна ўбачыць на сайце гарвыканкама.

Ложкаў для пацыентаў з каранавірусам стала менш

19 студзеня Гродзенская гарадская клінічная бальніца № 3 пачала паэтапнае перапрафіляванне ложкаў, падрыхтаваных для пацыентаў з каранавірусам. Прычына — паляпшэнне эпідэміялагічнай сітуацыі. 20 студзеня ў стацыянарныя аддзяленні паступілі першыя пацыенты не з каранавірусам. З 1 кастрычніка бальніца займалася лячэннем пацыентаў з інфекцыяй COVID-19, паведаміла «Гродзенская праўда».

Улады: перадумоў для трэцяй хвалі каранавіруса няма

Гродзенская вобласць выйшла на плато па захворванні каранавірусам, заявіў 10 снежня 2020 года старшыня Гродзенскага аблвыканкама Уладзімір Каранік «СБ-Беларусь Сегодня». Для трэцяй хвалі каранавіруса няма перадумоў, казаў былы міністр аховы здароўя раней. Паводле яго слоў, летам 2021 года з’явіцца вакцына, якая прайшла клінічныя выпрабаванні, сфармуецца імунная праслойка, а вірулентнасць інфекцыі знізіцца, — вірус стане сезонным.