Міністэрства працы і сацыяльнай абароны вывучае прапановы беларусаў па зменах у дэкрэтным адпачынку, паведаміла міністр працы Ірына Касцевіч. Мінпрацы спадзяецца на дапамогу прыватных садкоў і няняў.
Міністр сказала, што ў грамадстве ёсць запыт на развіццё паслуг па догляду за дзецьмі ранняга ўзросту, піша БелТА. У прыватнасці, гаворка ідзе пра дашкольныя ўстановы, прыватныя садкі, паслугі няні на гадзіну. «Думаю, прыватны бізнес адрэагуе на патрэбу і заяўку з боку грамадзян», — упэўненая Ірына Касцевіч.
Па словах Касцевіч, каля 40% маці маюць вышэйшую адукацыю і хочуць сумяшчаць сям’ю і прафесію.
Разабрацца з дэкрэтным адпачынкам даручыў Аляксандр Лукашэнка. Раней Ірына Касцевіч ўжо называла магчымыя варыянты. Сярод іх — пакінуць дэкрэтны адпачынак тры гады, пры гэтым аплачваць толькі два, або зрабіць два гады для ўсіх, тры — для шматдзетных.
Чытайце таксама: «Заплачу арэнду — не будзе за што жыць». Малы бізнес аб працы ва ўмовах пандэміі
