«Прысутныя былі напалоханыя». На дабрачыннае мерапрыемства дзіцячага хоспіса зноў прыязджала міліцыя

Увечары 17 кастрычніка, у суботу, на танцпляцоўцы ў Пышках прайшла дабрачынная сустрэча ў падтрымку гродзенскага дзіцячага хоспіса. Гарадскія ўлады былі апавешчаныя аб мерапрыемстве, але, нягледзячы на гэта, туды прыехала міліцыя, удзельнікаў здымалі на камеру і казалі, што мерапрыемства несанкцыянавана. Пасля праверкі сілавікі ўсё ж з’ехалі, абышлося без затрыманняў.

Мерапрыемства ў дапамогу дзіцячаму хоспісу анансавалі нават у раённых Telegram-чатах. Планаваліся выступы акцёраў, сабраліся людзі, валанцёры ўпрыгожылі сцэну і падрыхтавалі чай і пачастункі для гасцей, арганізавалі генератар.

Чытайце таксама: Цюлень, смаўжы і аўтазак. Акторы драмтэатра Гродна паказалі другі (не)спектакль

На мерапрыемства з’явіліся сілавікі, якія пачалі здымаць прысутных на відэакамеру і казаць аб тым, што мерапрыемства несанкцыянаванае.

«Яны пачалі пагражаць людзям затрыманнем. У нас павінны былі таксама выступіць акцёры драмтэатра, аднак з-за спрэчак і разборак ім давялося з’ехаць — яны ўжо спазняліся на спектакль. Але перад гасцямі выступіла актрыса Ірына Купчанка, якая прачытала вершы, да яе далучыліся і іншыя госці з вершамі, —. — Вядома, прысутныя былі напалоханыя».

Міліцыянты праверылі дакументы, стэлефанаваліся з гарвыканкамам, і ўсё ж далі правесці мерапрыемства.

«Мы ўдзячныя міліцыі, што яны адэкватна адрэагавалі», — сказала Hrodna.life Вольга Вялічка, дырэктарка хоспіса. Кожны месяц хоспіс праводзіць па 5−6 такіх мерапрыемстваў, і іх ніколі не ўзгаднялі, патлумачыла яна.

«Дабрачынныя акцыі не падпадаюць пад масавыя мерапрыемствы. У гарвыканкам трэба ўсяго толькі адправіць апавяшчэнне аб будучай акцыі, — распавяла Hrodna.life адна з удзельніц. — Пакуль спрабавалі разабрацца з тым, што нашы дакументы ўсё ж афіцыйныя і дазваляюць нам мерапрыемства, многія разышліся… Але не ўсё. Праз нейкі час мы ўсё ж змаглі скончыць нашу акцыю і сабраць дапамогу дзецям-інвалідам».

Двума днямі раней, 15 кастрычніка, Вольгу Вялічку затрымалі падчас дабрачыннай сустрэчы з жыхарамі Альшанкі. Тады міліцыя таксама казала, што мерапрыемства несанкцыянаванае, і пераконвала разысціся. Як высветлілася пазней, Вольгу затрымалі за ўдзел у акцыі пратэсту 6 верасня. Ноч і паўдня яна правяла ў ІЧУ. 16 кастрычніка прайшоў суд, дзе яе прызналі вінаватай і аштрафавалі на 405 рублёў. Пратакола затрымання на судзе не было, а пратакол аб правапарушэнні склалі без удзелу Вольгі.