Кшыштаф Спіхал з польскага горада Познань пераадолеў больш за 500 кіламетраў на ровары, каб упершыню прыехаць у Беларусь. Турыст распавядае, што мяжу перасёк без праблем: там усяго некалькі машын і веласіпедыст можа праехаць за 15 хвілін. Замежных турыстаў у горадзе з-за пандэміі амаль няма, затое часцей сталі прыязджаць беларусы, распавялі Hrodna.Life ў адміністрацыі горада.
«На мяжы ў мяне праверылі дакументы, тэмпературу і дазволілі ехаць. Тэст не бралі, — кажа Кшыштаф. — Я разумею абстаноўку ў свеце з-за каранавіруса і веру ў пандэмію, стараюся быць як мага больш асцярожным. Калі аслабілі каранцінныя меры ў Польшчы, вырашыў выправіцца на ровары падарожнічаць. Еду адзін, мінімум кантактаў».
Чытайце таксама: В Гродно, несмотря на эпидемию, появились туристы. Кто они?
У Беларусі Кшыштаф ўпершыню. Ён ведаў, што ў краіне не было каранціну і дзейнічае бязвізавы рэжым. З 10 лістапада 2019 года на тэрыторыі Брэсцкай і Гродзенскай абласцей працуе адзіны бязвізавы рэжым для замежных турыстаў. Знаходзіцца на гэтай тэрыторыі замежнікі могуць да 15 сутак. Таксама для грамадзян больш за 80 дзяржаў захоўваецца 30-дзённы бязвіз пры ўмове прыбыцця і адбыцця праз Нацыянальны аэрапорт «Мінск».
«Вырашыў скарыстацца момантам, быў якраз на Падляссі і прыехаў у Гродна. План мінімальны — убачыць галоўныя славутасці горада. Для нас, палякаў, важна ўбачыць дом, дзе жыла вядомая пісьменніца Эліза Ажэшка. Гэта я зрабіў, але яшчэ ў мяне была мэта ўбачыць філармонію. Я захапляюся музыказнаўствам. Прыгожы будынак, уражаны. (Аб'ект пасля рэканструкцыі афіцыйна адкрылі у 2019 годзе)».
Чытайте таксама: «Граница пустая». Первая за несколько месяцев группа иностранных туристов приехала в Гродно
У Гродна падарожнік прыехаў толькі на дзень, цяпер ён вяртаецца ў Польшчу. З пачатку ліпеня польскія грамадзяне па прыбыццю дадому з розных краін не адбываюць двухтыднёвы каранцін, як гэта было ў пачатку 2020 года.
Пазітыўных навінаў мала
Ва ўпраўленні спорту і турызму Гродзенскага гарвыканкама распавялі Hrodna.life, што пасля пандэміі замежных турыстаў у горадзе пакуль вельмі мала.
«Нядаўна мы размаўлялі з мясцовымі тураператарамі і пазітыўных навін па замежным турыстам пакуль няма, — распавёў Hrodna.life начальнік упраўлення Яўген Ародзь. — У асноўным едуць індывідуалы і едуць слаба. Горад і турфірмы імкнуцца нешта прыдумаць, плануем што ў жніўні сітуацыя зменіцца. Пакуль жа ў нас актыўна працуе ўнутраны турызм — людзі з іншых рэгіёнаў краіны сталі часцей прыязджаць у Гродна».
