Падарожжа Грэя: як сабака выпаў з акна ў Гродна і рыхтуецца пераехаць у ЗША

Грэй гатовы пераехаць у ЗША ці Еўропу. Фота: vk.com/animalsgrodno

9 ліпеня 2020 года ў Гродне меркавана з акна выкінулі сабаку. У горадзе такое ўжо здаралася: у 2018 годзе зааабаронцы падабралі ў завулку Даватара параненага сабаку. Гродзенцы скінуліся на лячэнне і прэпараты для яго, назвалі Грэем. Пазней сабаку павезлі ў рэабілітацыйны цэнтр у Маскву. Адтуль ён рыхтуецца адправіцца ў ЗША ці Еўропу. Рэдакцыя Hrodna.Life запісала неверагодную гісторыю прыгодаў Грэя з Гродна.

Раніцай 12 жніўня 2018 года да дома 8Б у завулку Даватара выклікалі адлоў. На месцы лаўцы выявілі ранёнага сабаку. Высветлілася, што яго выкінулі з чацвёртага паверха.

На выгляд сабаку было каля 5 гадоў. Яго прытулілі зоаабаронцы і назвалі Грэем. «У ежы непатрабавальны. Да іншых жывёл ставіцца дбайна. Вышэй сярэдняга памеру. Дае лапу і любіць ездзіць [на аўтамабілі]», — так пазней апісвалі сабаку ў аб’яве аб пошуку новых гаспадароў.

У сабакі былі вывіхі, пераломы і расколіны костак. Фота: vk.com/ani

Сабаку адвезлі ў клініку «Друзья» па вул. 1 Мая, 19. Ветэрынар зафіксаваў вывіхі, пераломы і расколіны костак, удары па ўсім целе. Сабаку паставілі кропельніцу і ўводзілі абязбольвальныя прэпараты, зрабілі агульны аналіз крыві.

У Гродне выкінулі сабаку з чацвёртага паверху. Шукаюць сведкаў інцыдэнту і новых гаспадароў для жывёлы

Праз два дні, 14 жніўня, Грэя выпісалі для хатняй рэабілітацыі і падрыхтоўкі да аперацыі на сустаў. Але ўжо ўвечары 15 жніўня сабака вярнуўся ў клініку, бо не мог самастойна памачыцца. Канчаткова сабака вылечыўся толькі ўвосень — у кастрычніку 2018 года. Тады яму пачалі шукаць гаспадара. У пункце ўтрымання безнаглядных жывёл па вул. Дамброўскага, 10, у валанцёраў ёсць і іншыя жывёлы, трэба было знайсці Грэю новы дом.

На лячэнне сабакі скінуліся неабыякавыя гарадзенцы: сабралі 552,20 рублёў. Грошы пайшлі на лячэнне, прэпараты і аперацыю на сустаў.

Грэю шукалі новы дом — прайсці рэабілітацыю ў пункце адлову складана. Фота: vk.com/animalsgrodno

Гаспадароў жывёле не знайшлі

У пункце адлову сабака пачаў дзічэць і губляць зрок, а новых гаспадароў у Гродне яму так і не знайшлі. Тады, у лістападзе 2018 года яго адправілі ў рэабілітацыйны цэнтр у Маскве, дзе жыве дагэтуль.

Грэя маглі ўсыпіць у любы момант, тады яго пагадзіліся забраць валанцёры з Масквы. «Пераезд у Расію быў для яго адзіным шанцам», — сказалі Hrodna.life зааабаронцы.

«Яму няма куды вяртацца»

Рэабілітацыйны цэнтр у Маскве рэкламуе жывёл у ЗША і Еўропе. Там больш ахвотна забіраюць дарослых або складаных жывёл, у адрозненне ад краін СНД, распавялі Hrodna.life зааабаронцы.

— Пакуль у нас няма пацверджанай інфармацыі, што ён туды паедзе. Але і вяртаецца яму няма куды. А цэнтр рэабілітацыі таксама не можа трымаць сабаку вечна, бо ёсць яшчэ шмат іншых крытычна маюць патрэбу. Яму зрабілі ўсе неабходныя медыцынскія працэдуры, кастрыравалі. І цяпер ён гатовы да новага дому, — распавялі зааабаронцы Hrodna.life.

Гаспадара сабакі раней пакаралі штрафам паводле арт. 15.45 КоАП — Жорсткае абыходжанне з жывёламі. Памер штрафу ў прэс-службе УУС Гродзенскага аблвыканкама ў размове з Hrodna.life не змаглі ўдакладніць.

Сабака Грэй ў цэнтры рэабілітацыі ў Маскве. Фота: Фота: vk.com/animalsgrodno

«Складана даказаць факт жорсткага абыходжання»

— Закон ёсць, а пакарання няма, — адказваюць у пункце адлову на пытанне, чаму выпадкі жорсткага абыходжання з жывёламі працягваюцца. — Вельмі складана даказаць сам факт жорсткага абыходжання. У нас людзі не бачаць каштоўнасці жыцця жывёл. Быў у нас выпадак, калі шчанюкоў узялі ў пункце, а потым выкінулі на прыпынку. Аднаго задушыла машына. Міліцыя не знайшла ў гэтым складу злачынства.

Важна ўводзіць масавае чыпіраванне жывёл, каб вызначыць, хто яго выкінуў. Як мінімум, за гэта трэба даваць штраф — не кажучы ўжо пра штрафы за здачу ў Пункт адлову сваіх жывёл, паведамілі зааабаронцы.

За жорсткае абыходжанне з жывёламі прадугледжана адміністрацыйная і крымінальная адказнасць. У 2020 годзе распачалі пяць адміністрацыйных спраў па факце жорсткага абыходжання, паведамілі Hrodna.life у прэс-службе УУС Гродзенскага аблвыканкама. Крымінальных справаў не заводзілі. Аднойчы толькі накіравалі справу ў Следчы камітэт для ўзбуджэння крымінальнай справы.

Артыкул 15.45 КоАП — Жорсткае абыходжанне з жывёламі, што пацягнула іх гібель або калецтва, а роўна катаванне жывёл, цягне накладанне штрафу ў памеры ад дзесяці да трыццаці базавых велічынь або адміністрацыйны арышт.

Артыкул 339.1 УК — Жорсткае абыходжанне з жывёлай, якое пацягнула яго гібель або калецтва, здзейсненае з хуліганскіх, карыслівых ці іншых нізінных падахвочванняў альбо ў прысутнасці заведама малалетняга, караецца грамадскімі працамі, або штрафам, або папраўчымі работамі на тэрмін да аднаго года, або арыштам.

Тое ж дзеянне, учыненае паўторна альбо групай асоб, — караецца арыштам, ці абмежаваннем волі на тэрмін да аднаго года, або пазбаўленнем волі на той жа тэрмін.

Што з сабакам, якога нядаўна меркавана выкінулі з акна?

Сабаку, якога 9 ліпеня знайшлі з пашкоджаннямі на вуліцы Кляновая, 31, прааперавалі, ён павінен выйсці з наркозу. Пакуль сабака знаходзіцца ў ветклініцы ў цяжкім стане.

Гаспадароў сабакі не знайшлі, як і сведак выпадку. Верагодна, яе ўсё ж не выкінулі з акна, а збілі ў іншым месцы і падкінулі да дома. «Гэта адзінае меркаванне. Іншай лагічнай прычыны, каб людзі так масава не здавалі чалавека, які мог выкінуць сабаку з акна, цяжка ўявіць», — распавёў Hrodna.life Максім Базыленка з прэс-службы УУС Гродзенскага аблвыканкама.

Магчыма, сабаку збілі ў адным месцы і падкінулі на вул Кляновая

В Гродно выкинули собаку из окна. Что говорит милиция

UPD. Грэй не паедзе ў ЗША — ён застаецца жыць у работніцы з Цэнтра рэабілітацыі «Рэспубліка Сябар». Сабака ачуняў, не ўдалося захаваць зрок у адным воку, паведамілі ў Пункце адлову Hrodna.life.