Афіцыйна на 30 траўня ў Беларусі пацвердзілі 41 658 выпадкаў каранавіруса, паведамляе Міністэрства аховы здароўя. Ачунялі і выпісаныя 17 964 пацыентаў, 229 чалавек з выяўленым раней COVID-19 памерлі.
За апошнія суткі дыягнаставалі 894 новыя выпадкі COVID-19, паводле афіцыйных дадзеных памерлі 5 чалавек, 574 пацыентаў ачунялі і былі выпісаныя.
Усяго з пачатку ўспышкі ў Беларусі праведзена 526 559 тэстаў, з іх за апошнія суткі - 14 141. Сярод іх 6,3% выявіліся станоўчымі.
21 мая Міністэрства аховы здароўя выдала загад, які ўносіць змены ў папярэднія дакументы, што тычацца аказання меддапамогі пацыентам з COVID-19, піша t*t.by. Зараз, каб паставіць пацыенту дыягназ COVID-19, трэба выкананне хаця б аднаго з пунктаў:
- Аднакратны станоўчы тэст ПЦР на каранавірус. Гаворка ідзе пра мазок.
- Тыповая рэнтгеналагічная сімптаматыка (паводле дадзеных кампутарнай тамаграфіі) і клінічная карціна, у тым ліку ў спалучэнні з станоўчым тэстам лабараторнай дыягностыкі, у тым ліку экспрэс-тэстам на антыцелы.
- Два станоўчыя тэсты сералагічнай дыягностыкі (экспрэс-тэсты) з інтэрвалам не менш за суткі. Гаворка ідзе пра тое, што тэст паказвае, ці ў чалавека ёсць імунаглабуліны М, якія дэманструюць актыўную фазу захворвання.
Раней дыягназ COVID-19 ставіўся толькі на падставе станоўчага ПЦР-тэсту. Зараз магчымасці пашырылі: яго можна паставіць і пры тыповай КТ-карціне ў лёгкіх, і клінічнай карціне захворвання. Што маецца на ўвазе пад клінічнай карцінай, у загадзе не прапісана, але гаворка можа ісці пра павышаную тэмпературу, сухі кашаль, страту нюху.
Тэсты па-новаму
Важныя змены закранулі тэставанне пацыентаў з лёгкімі і бессімптомнымі формамі каранавіруснай інфекцыі, у якіх няма каранавіруснай пнеўманіі. Цяпер такім людзям на 14-я суткі ад моманту кантакту з заражаным робяць экспрэс-тэст на антыцелы. Калі ён паказвае, што чалавек здаровы ці што ў яго ёсць імунаглабуліны G, якія паказваюць на імунітэт, яму закрываюць бальнічны. Калі тэст пакажа, што ў яго ёсць імунаглабуліны М, то бальнічны закрыюць на 21-я суткі з моманту кантакту з заражаным.
Раней пры лёгкай і бессімптомнай форме захворвання тэставанне метадам ПЦР праводзілася паўторна на 10-ы дзень кантакту, а пры станоўчым выніку далей кожныя пяць дзён да атрымання аднаго адмоўнага.
Таксама раней чалавека з COVID-19 перад выпіскай з лякарні теcтавалі на наяўнасць каранавіруса метадам ПЦР, цяпер гэтым метадам тэстуюць, калі чалавека пераводзяць на медыцынскую рэабілітацыю або на санаторна-курортнае лячэнне. Вынік тэсту ў гэтым выпадку павінен быць адмоўным.
Калі пацыент лячыўся ў шпіталі і ў яго ўжо няма клінічных сімптомаў, яго могуць выпісаць або перавесці на амбулаторнае лячэнне пасля экспрэс-тэсту на антыцелы і адсутнасці імунаглабулінаў М або пры наяўнасці імунаглабулінаў G.
— Можна сказаць, што новым загадам Міністэрства аховы здароўя пашыраны дыягнастычныя магчымасці за кошт шырокага ўкаранення метадаў экспрэс-тэставання і прызнання вынікаў КТ паўнавартасным дыягнастычным крытэрам, а таксама афіцыйна прапісаны найважнейшыя змены ў тэрапіі COVID-19, звязаныя з назапашваннем агульнасусветнага вопыту ў лячэнні гэтай інфекцыі. Аднак заўважанае многімі зніжэнне ролі ПЦР-даследаванняў вядзе да кардынальнай змены падыходу ў дачыненні да эпідэміялагічнай бяспекі - бо зараз не трэба быць СOVID-адмоўным, каб вярнуцца ў калектыў, — пракаментавала змены інфекцыяністка Ганна Шыманская.
