Праз тыдзень – 14 і 15 сакавіка – у Гродне два дні запар пройдуць канцэрты цікавых беларускіх выканаўцаў. У суботу ўпершыню ў Гродне выступіць гурт, які запачаткаваў Аляксандр Кулінковіч як акустычны праект Neuro Dubel, у нядзелю гродзенцы пачуюць фэнтэзі-рок ад “Kaciaryna Vadanosava & Fantasy Orchestra”.
14-га сакавіка ў Гродне ўпершыню выступіць праект лідара культавага рок-гурта Neuro Dubel Аляксандра Кулінковіча. У канцэрце прымуць удзел музыкі, з якімі выступаў Аляксандр, на вакале будзе Юрый Навумаў.
У праграме вялікага канцэрту прэзентацыя альбома “Нездаровы лад жыцця” (на якім у тым ліку ёсць 2 песні, якія выконвае Кулінковіч), а таксама найлепшыя хіты Neuro Dubel.
Група «Веласіпедыстаў» створана ў 2016 годзе як акустычны праект гурта «Neuro Dubel». Асноўны націск робіцца на песні ліхіх 90-ых гадоў, якія прыхільнікі Neuro Dubel не чулі даўно ці ўвогуле ніколі, і ўжо дакладна не ў жывым варыянце.
15-га сакавіка ў Гродна абудзецца вялікая прэзентацыя новага альбому “Стрэчанне” адной з самых містычных айчынных вакалістак Кацярыны Ваданосавай. Рыхтуецца адмысловая праграма, дзе таксама прагучаць і найлепшыя творы з папярэдніх гадоў.
