Этнакрама «Цудоўня» запускае праект «Кот Горадні». Галоўная ідэя праекта — прадставіць наш горад у цікавай і непапсовай форме. Але пры гэтым — праз папсовыя і звычайныя рэчы. Такія, як сувенірныя паштоўкі і магніты.
Хацелі каляндар з экскурсіяй, атрымаліся магніты з коцікамі
Гаспадар «Цудоўні» Андрэй Несцяровіч кажа, што спачатку ў планах быў крыху іншы прадукт.
«Ідэя праекта распачыналася з распрацоўкі календара-экскурсіі, дзе на кожны месяц пазначаны гарадзенскія адметнасці: замкі, прывід Фары Вітаўта, Каложская царква, ваданапорныя вежы Кася і Бася і іншыя. Гэта быў шляхаводнік па горадзе з менш вядомымі прамежкавымі пунктамі, такімі як Музей Януша Паруліса. З кароткім апісаннем месца куды чалавек патрапіў».
Ідэю календара-экскурсіі адклалі на наступны год, а ўжо адмаляваныя будынкі з галоўнымі персанажамі вырашылі перанесці на фармат сувеніраў, кшталту магніцікаў і паштовак.
«Гэта самы просты і запатрабаваны спосаб прэзентацыі горада тым, хто сюды прыязжае», — лічыць каманда «Цудоўні».
Усе любяць коцікаў
У этнакраме лічаць, што большасць паштовак і магнітаў з выявай Гродна зроблены танна і непрывабна, і гэта праблема. Таму «Цудоўня» вырашыла зрабіць гэта нестандартна і па-свойму цікава. Галоўным героем выступае сам горад, а коцікі прэзентуюць яго праз гродзенскія славутасці.
Магніты ўжо можна прыдбаць у Этнакраме «Цудоўня». Таксама крамя вядзе збор сродкаў на друк паштовак, якія ў будучыні плануюць распаўсюдзіць па розных гродзенскіх кропках.
Зрабіць перадзамову і прыдбаць набор паштовак можна па спасылцы:
https://epos.hutkigrosh.by/pay/pay?param=10 248−1-kh8
