Гродзенец стварыў мабільную гульню, якая дапамагае вывучыць беларускую мову

Яўген Сліж з Гродна стварыў бясплатны дадатак Lemantar, з якім можна вучыць беларускую мову. Гульня з’явілася, каб перад школай навучыць чытаць старэйшага сына Сцяпана. Цяпер павучыцца могуць і іншыя дзеці. Цікавай яна будзе і дарослым, якія хочуць падцягнуць беларускую мову ці проста пабавіць час. Дызайн гульні распрацаваў Ілля Кравец з Мінску.

Дадатак змяшчае шырокі набор словаў з паўсядзённага жыцця: адзенне, ежа, жывёльны і раслінны свет, цела чалавека. Ён дазваляе даведацца значэнне слоў на беларускай мове, а таксама іх напісанне.

— Ідэя гульні ўзнікла летам, за некалькі месяцаў перад тым, як старэйшы сын Сцяпан пайшоў у школу. Натуральна, яна з’явілася з патрэбы навучыць сына чытаць, каб ён трошкі быў ужо падрыхтаваны да школьнага жыцця, — расказвае Яўген пра ідэю гульні.

Фота: play.google.com
Фота: play.google.com

Логіка гульні простая. Карыстальніку паказваецца слова і чатыры фотаздымкі, адзін з якіх адпавядае дадзенаму слову. Трэба выбраць гэты здымак. Словы сфарміраваны па невялічкіх міні-гульнях. Напрыклад, якія заканчаюцца на «А» ці ў якіх ёсць дзве «О» і гэтак далей.

За колькасць правільных адказаў удзельнік атрымоўвае балы-зорачкі, якія дазваляюць пераходзіць на новы ўзровень. Кожны ўзровень адпавядае пэўнай жывёле і ўтрымлівае невялічкі падарунак — вядомы беларускі выраз, прымаўку ці прыказку. Таксама ёсць магчымасць пагуляць у словы па пэўных тэмах: «Космас», «Дом», «Чалавек» і г. д.

Фота: play.google.com
Фота: play.google.com

Зараз у гульні 14 узроўняў, але гэта не ўзроўні па складанасці словаў, а больш як індыкатар праходжання гульні ў цэлым.

— Гульня перш за ўсё накіравана на дзетак, якія вучацца ці ўмеюць чытаць. Дарослым яна будзе таксама цікавай ды карыснай, асабліва тым, хто адчувае патрэбу падцягнуць узровень свайго слоўнікавага запасу па беларускай мове. Ды і проста пабавіць час гульня дапаможа, — кажа Яўген.

Некаторыя гродзенцы ўжо пагуляліся з дзецямі ў гульню і ацанілі яе. Вось што яны пішуць у каментарыях на Google Play.

«Добры дапаможнік для дзяцей па беларускай. Маёй дачцэ вельмі спадабалася. Усю навагоднюю ноч з сяброўкай гуляла!»

«Тое, што патрэбна нашым дзеткам, дзякуй за карысную гульню»

«Дзякуй за дадатак па вывучэнні тэматычнай лексікі па-беларуску!»

«Паспрабавала. Мне спадабалася гульня. Карысталася такой для вывучэння польскай мовы. Добра, што зараз ёсць такая гульня на беларускай мове! Паспрабуем з Матвеем»

Усе ацэнкі на Google Play — 5,0.

Фота: play.google.com
Фота: play.google.com

— Большасць водгукаў была станоўчая, гульня спадабалася дзеткам. Таксама было шмат карысных заўваг па словах і малюнках да іх, ды і памылкі не засталіся без увагі. Водгукі не толькі дазваляюць паляпшаць дадатак, але і дазваляюць зразумець, што праца была зроблена не дарма і надаюць сілаў працаваць далей, — кажа Яўген.

Ён дадае, што дадзеная версія гульні - толькі пачатак. Ёсць планы па паляпшэнні функцыянала і новых магчымасцях.

— З найбліжэйшага — зрабіць магчымасць гуляць без інтэрнэту, а таксама даць магчымасць удзельнікам самастойна дадаваць фотаздымкі да словаў, каб павялічыць колькасць словаў у гульні. Дадатак некамерцыйны і з адкрытым зыходным кодам, таму кожны можа прыняць удзел у яго паляпшэнні ці напаўненні. Планы ёсць яшчэ на некалькі дадаткаў, але з большасці яны накіраваны на іншую аўдыторыю.

Падзяліцца

Апошнія запісы

У Гродне падаражэў праезд у гарадскім транспарце — і на прыгарадных маршрутах

З 5 красавіка ў Гродне талоны на праезд у гарадскім грамадскім транспарце даражэюць на 10…

4 красавіка 2025

«Інтэр'еры з Pinterest» і «цэны як у Венецыі». У Гродне адкрылі буцік-гатэль The Cult на месцы знесенага гістарычнага будынка

У Гродне на Віленскай, 37 адкрыўся новы буцік-гатэль і рэстаран The Cult - і выклікаў…

2 красавіка 2025

Гронкі кветак, люстэркі і ружовае футра. У Гродне з’явіліся вясновыя фотазоны

Пакуль сады толькі заквітнеюць, ва ўстановах і крамах Гродна падрыхтавалі вясновыя фотазоны. Часта гэта гронкі…

2 красавіка 2025

Старадаўнія падвалы ў цэнтры Гродна прыцягваюць бізнес. Калі памяшканні можна выкарыстоўваць у камерцыйных мэтах?

На Савецкай вуліцы каля 80% падвалаў задзейнічаны пад бізнес, прыводзіць статыстыку газета “Гродзенская праўда”. Пры…

1 красавіка 2025

У Гродне адкрыецца школа барыста — арганізатары хочуць, каб ва ўстановах варылі якасную каву

Уладальнікі гродзенскіх кавярань «Крепкий белый» і «Крепкий черный» запускаюць школу барыста. Летась арганізатары ўжо праводзілі…

1 красавіка 2025

Гродзенец стварыў дакладную копію Фарнага касцёла ў мініяцюры — і друкуе фігуркі на 3D-прынтары

Гродзенец Ігар Апякун канструюе мэблю для круізных лайнераў - стварае прататыпы праз спецыяльную праграму. Ігар…

31 сакавіка 2025