Гродзенскія футбалісты папаліся на дамоўных матчах

Следчы камітэт накіраваў у Беларускую федэрацыю футбола дакумент па выніках расследавання крымінальнай справы аб маніпуляванні вынікамі некаторых матчаў сезонаў 2017 і 2018. Абвінавачванні прад’яўленыя і некалькім гродзенскім футбалістам.

У дамоўных матчах было задзейнічана больш за 30 чалавек, сярод іх ёсць і выхаванцы гродзенскага футбола: Аляксей Сучкоў, Ігар Лісіца, Андрэй Штыгель, Сяргей Лявіцкі і Артур Бомбель.

Аляксей Сучкоў, па версіі следства, быў датычны да несумленным гульняў у перыяд выступаў за наваполацкі «Нафтан» і пажыццёва дыскваліфікаваны Беларускай федэрацыяй футбола і абвешчаны персонай нон грата па выніках расследавання «справы аб арганізацыі дамоўных матчаў».

Ігар Лісіца атрымаў штраф у памеры 300 базавых велічыняў (8100 рублёў) і адхілены ад футбола на 3 гады. Андрэй Штыгель, Артур Бомбель і Сяргей Лявіцкі адхіленыя на год і аштрафаваныя на 2700 рублёў кожны.

Старшыня АБФФ Уладзімір Базанаў пракаментаваў сітуацыю з дамоўнымі матчамі:

— Асацыяцыя катэгарычна не прымае любых махінацый на футбольным полі і вакол яго. Таму разам з праваахоўнымі органамі вядзе актыўную барацьбу супраць «дагаварнякоў». Таму пакаранні, заснаваныя на нашых футбольных законах, часам нават больш суровыя, чым судовыя.

У выпадках з футбалістамі, якія прызналі сваю датычнасць да супрацьпраўных дзеянняў, КДК ужо вынес вердыкт. Аднак мы не выключаем, што пасля заканчэння судовага паседжання, нашы санкцыі могуць быць больш жорсткімі. Максімальна сурова мы паставімся і да тых грамадзян, якія спрабуюць сысці ад адказнасці.

Падкрэслю: АБФФ і далей будзе накіроўваць максімальныя намаганні на выяўленне дамоўных матчаў і адхіленне ад футбола тых, хто падманам спрабуе зарабіць на любімай гульні.

Канчатковае рашэнне па санкцыях у дачыненні да фігурантаў справы, а таксама поўны спіс матчаў, дзе прысутнічала маніпуляванне вынікамі, камітэт кантрольна-дысцыплінарны і па этычных пытаннях апублікуе пасля завяршэння судовага працэсу.