Што ў Гродне з аб’ектамі, якія прадалі за адну базавую?

У Гродне з аўкцыённых таргоў было прададзена 8 невыкарыстоўваемых аб’ектаў. Тры з іх, будынкі былых ФАПаў паліклінік горада, размяшчаюцца ў вёсках Гродзенскага раёну. Як распараджаюцца набытым маёмасцю іх новыя ўладальнікі, што яны ўжо зрабілі, з якімі цяжкасцямі сустрэліся і якая дапамога патрэбна ад улады? Пра гэта ішла размова на рабочай нарадзе ў старшыні Гродзенскага гарвыканкама Мечыслава Гоя, піша grodnonews.by.

Як паведаміла начальнік аддзела камунальнай маёмасці гарвыканкама Таццяна Рудая, у Гродне вялікіх праблем з выкарыстаннем прададзеных аб’ектаў няма, усе яны знаходзяцца ў працы.

На месцы былога ваеннага гарадка па вуліцы Пралетарская-Шчорса вырас сучасны мікрараён, пры гэтым атрымалася захаваць дзве старыя казармы, пабудаваныя напярэдадні Першай сусветнай вайны. Іх прадалі двум інвестарам за адну базавую велічыню год таму. Новымі ўласнікамі казармаў сталі ТАА «Спектр-Лайн» і ТАА «СМУ-14». Гаспадары абавязаны на працягу аднаго года распрацаваць праектна-каштарысную дакументацыю на правядзенне рэканструкцыі або капітальнага рамонту нежылых будынкаў, правесці работы на працягу трох гадоў з даты заключэння дагавора куплі-продажу. Адзін з гэтых аб’ектаў, набыты гродзенскім ТАА «Спектр-Лайн», павінен запрацаваць да канца гэтага года і ён будзе запатрабаваны жыхарамі пабудаванага мікрараёна.

Расійскі інвестар набыў за адну базавую велічыню практычна разбураны дом на Урыцкага, 5. Сёння на гэтым месцы адноўлены сучасны будынак з захаваннем першапачатковага аблічча. У ходзе рэканструкцыі многія пытанні вырашаліся з Міністэрствам культуры, бо будынак знаходзіцца ў гістарычным цэнтры горада. Тут ТАА «Росмед» плануе адкрыць дыягнастычны цэнтр, дзе могуць абслугоўвацца і бязвізавыя замежныя турысты.

Новы гаспадар басейна «Лазурный» вядзе падрыхтоўчыя працы перад пачаткам рэканструкцыі будынка пад аб’ект грамадскага прызначэння. Нагадаем, што басейн ў 1973 годзе пабудаваў Гродзенскі завод карданных валаў. Гэта быў першы крыты басейн горада плошчай амаль 2 000 квадратных метраў. Ён карыстаўся вялікім попытам у гродзенцаў. Па ўмовах аўкцыёну на працягу года новы гаспадар басейна абавязаны вырабіць праектна-каштарысную дакументацыю на рэканструкцыю або капітальны рамонт былога басейна пад аб’ект грамадскага прызначэння. Пры гэтым не менш за 50% яго плошчаў павінна выкарыстоўвацца для фізкультурна-аздараўленчых і спартыўных мерапрыемстваў. На працягу трох гадоў уладальнік «Лазурного» павінен завяршыць усе працы з добраўпарадкаваннем прылеглай тэрыторыі.

У чэрвені гэтага года за адну базавую велічыню быў прададзены аб’ект на завулку Перамогі, 10. Гэта комплекс будынкаў філіяла Гродзенскага гарбарнага завода, размешчаных на тэрыторыі плошчай больш за тры гектары. Інвестар павінен у тэрмін да чатырох гадоў з моманту заключэння дагавора прывесці ў парадак тэрыторыю, пустыя будынкі выкарыстоўваць пад адміністрацыйныя, вытворчыя, аб’екты камунальнага прызначэння.