З пачатку жніўня праходзіць рамонт пастамента і самога помніка-танка ў цэнтры Гродна. Пасля гэтага на танку з’явіцца новы надпіс.
Паводле інфармацыі Hrodna.life, на танку з’явіцца надпіс «75», якая сімвалізуе 75-годдзе вызвалення Беларусі і 75-годдзе ўтварэння Гродзенскай вобласці. Новы надпіс заменіць стары «200», якую хтосьці нанёс па памылцы больш за 20 гадоў таму.
«Наш танк адносіўся да другога батальёну — пра што кажа першая „двойка“. Але свайго нумара не меў, таму што заканчваецца на „00“. Хто намаляваў алейнай белай фарбай лічбу, якой не магло быць у прыродзе, невядома. Каб адлюстраваць гераізм воінаў, для прыгажосці побач з нумарам дамалявалі „зорачкі“, якія азначаюць колькасць збітых машын ворага», — распавядаў у 2009 годзе газеце «Вячэрні Гродна» гісторык Аляксандр Сявенка.
Гісторык Дзмітрый Люцік у 2019 годзе прапанаваў гарадскім уладам нанесці на вежы танка абазначэнні танкавых палкоў кавалерыйскага корпуса Аслікоўскага, якія вызвалялі Гродна ў 1944 году — 104 і 198 танкавыя палкі. Але, мабыць, ад гэтай ідэі пакуль вырашылі адмовіцца.
Даведка
Помнік воінам-вызваліцелям — танк Т-34−85, размешчаны на краі Савецкай плошчы, усталяваны ў памяць пра воінаў 2-га і 3-га Беларускіх франтоў, якія ўдзельнічалі ў вызваленні Гродна 16 ліпеня 1944 года. Яго адкрыццё адбылося 23 лютага 1968 года.
У пачатку 2000-х у Гродне загаварылі аб пераносе танка на Курган Славы, каб «палегчыць» развязку. Але пасля рэканструкцыі плошчы знакаміты Т-34 застаўся на сваім месцы.