Днём 29 чэрвеня ў Лідзе на вул. Маладзёжнай адбылося «сямейнае» ДТЗ з удзелам двух нецвярозых кіроўцаў на адной машыне.
Сям’я лідчан здзейсніла фактычна два ДТЗ у мікрараёне Маладзёжны, піша lidanews.by. Спачатку на Rover 416 ў агарод заехала жонка, а затым у плот — муж. Супрацоўнікаў ДАІ выклікалі відавочцы. Нарад, які прыбыў на месца здарэння, выявіў толькі пабіты аўтамабіль.
Выйшаўшы з крамы, жонка папрасіла мужа 1975 года нараджэння дазволіць ёй сесці за руль. Мужчына дазволіў, хоць жонка была нецвярозая і ніколі не мела пасведчання кіроўцы. Аднак праехала тая няшмат — пакуль аўтамабіль не ўткнуўся ў бульбяное поле.
Тады за руль зноў сеў мужчына, але праехаць больш за сто метраў на пашкоджаным аўтамабілі ён не змог і, страціўшы кіраванне, заехаў у бетонны плот аднаго з прыватных дамоў. Пакінуўшы машыну на месцы здарэння, муж і жонка сышлі дадому, дзе пазней іх затрымалі супрацоўнікі ДАІ.
Ні мужчына, ні яго жонка, ні хто-небудзь з выпадковых мінакоў не пацярпелі. Кіроўца быў дастаўлены на медасведчанне, якое паказала наяўнасць у яго арганізме 2,38 праміле алкаголю.
У выніку на іх дваіх было складзена дзесяць пратаколаў: шэсць на мужа (за нецвярозае кіраванне, здзяйсненне ДТЗ, пакіданне месца ДТЗ, за перадачу права кіравання асобе, які знаходзіцца ў стане алкагольнага ап’янення, за перадачу права кіравання асобе, які не мае права кіравання і за няпройдзены ТА) і чатыры на жонку (за нецвярозае кіраванне, кіраванне без правоў, ДТЗ і адсутнасць ТА).
