Пачаўся сезон пакосу травы. Што рабіць, калі касцы пашкодзілі вашу машыну

Пачаўся сезон пакосу травы, а значыць і «супрацьстаянне» припаркованых аўтамабіляў і газонакасілак. У сітуацыі, калі пры пакосе пашкоджваюцца аўтамабілі, трапляюць жыхары шматкватэрных дамоў, піша autogrodno.by. Некалькі такіх выпадкаў ужо адбылося ў Гродне. Хто вінаваты і што рабіць?

Далёка не заўсёды вінаватыя касцы. Многія аўтаўладальнікі пакідаюць транспарт на стаянках, нягледзячы на тое, што ЖЭС апавясціў аб пакосе. Некаторыя паркуюцца проста на газоне. Хтосьці не ўбачыў аб’яву або пакінуў машыну на ўзбочыне. У любым выпадку вынік пашкоджання адзін — аўтамабіль неабходна рамантаваць.

— Выявіўшы пабітае шкло або характэрныя сколы на транспартных сродках, грамадзяне павінны звярнуцца ў міліцыю. На сённяшні дзень Кастрычніцкім РАУС Гродне праводзіцца некалькі праверак па фактах пашкоджання аўтамабіляў пры пакосе травы. Ва ўсіх іншамарках было разбіта шкло. Супрацоўнікі міліцыі выяўляюць абставіны здарэння і вінаватых асоб, — распавёў намеснік начальніка Кастрычніцкага РАУС Гродна падпалкоўнік міліцыі Канстанцін Смалякоў. — Аб выніках праверак ва ўстаноўленым законам парадку паведамляецца зацікаўленым асобам.

У адпаведнасці з артыкулам 933 ГК Рэспублікі Беларусь, шкода, прычыненая асобе цi маёмасцi грамадзянiна, а таксама шкода, прычыненая маёмасці юрыдычнай асобы, падлягае кампенсацыi ў поўным аб’ёме асобай, якая прычыніла шкоду. А артыкул 937 абвяшчае, што юрыдычная асоба або грамадзянін пакрывае шкоду, прычыненую яго работнікам пры выкананні сваіх працоўных абавязкаў. Таму, калі выяўлена, што машына пашкоджана менавіта працаўніком, які здзяйсняў пакос, уладальнік транспартнага сродку мае права патрабаваць кампенсацыю.

— Што тычыцца менавіта нашага ЖЭСа, то жыхарам дамоў заўсёды паведамляецца аб днях пакосу травы. Аб’явы з інфармацыяй мы размяшчаем на інфармацыйных стэндах дамоў. У выпадку, калі пакінуты на стаянцы без парушэння Правілаў дарожнага руху аўтамабіль пашкоджаны нашым работнікам, якія ажыццяўляў пакос травы, панесеныя страты пакрывае страхавая кампанія, — патлумачыў начальнік ЖЭС № 20 Тадэвуш Калошыч. — Для гэтага спачатку неабходна звярнуцца ў УЖРЭП. Аднак варта ўлічваць, што не ўсе газоны і тэрыторыі з азеляненнем знаходзяцца ў падпарадкаванні ЖЭСаў. Ёсць шэраг іншых арганізацый, за якімі замацаваны гэтыя ўчасткі.

Ва УУС Гродна раяць аўтаўласнікам быць больш уважлівымі і не паркаваць транспарт з парушэннем ПДР. Калі бачна, што плануецца ці ўжо ажыццяўляецца пакос травы, лепш пакінуць аўтамабіль у іншым месцы.