Нядаўна прэзентаванае марозіва з валошкамі пад брэндам “Белы полюс” нечакана скончылася ў крамах. І калі з’явіцца новая партыя, надпіса Žyvie Biełaruś! на пакунку ўжо не будзе, піша marketing.by.
Знікненне прадукту тлумачаць тым, што вытворца не чакаў такога ажыятажу:
“Запускаючы валошкавае марозіва, мы чакалі высокі попыт на яго, але не рыхтаваліся да такой моцнай успышкі цікавасці сярод пакупнікоў, – кажа Максім Журовіч, намеснік дырэктара па маркетынгу “Белага полюса”. – Нашы аналітыкі планавалі аб’ёмы, зыходзячы з тыпавой сітуацыі невысокага сезона марозіва. Але продажы цяпер такія, нібы на вуліцы не дажджы, а ўжо ідзе высокі сезон. Мы вырабілі 8 тон пламбіру, у разліку, што гэтага хопіць да канца месяца “.
Аднак надпіса Žyvie Biełaruś! у размоўніку для замежных турыстаў на пакунку марозіва ўжо не будзе – гэта пацвердзілі ў PR-студыі Sette, якая займалася прасоўваннем брэнда.
“Наступная партыя марозіва выйдзе ўжо ў абноўленым пакаванні і працягне стратэгію, якую мы выбралі, запускаючы прадукт. На абгортцы будзе размешчаны размоўнік, фразы якога будуць абнаўляцца на працягу ўсяго лета. Пакуль у планах трыццаць фраз: па адной на кожны дзень “безвиза”, – сказана ў прэс-рэлізе.
