У Міжнародны дзень барацьбы з гамафобіяй – 17 мая – МУС выказаўся на сайце пра сваё стаўленне да ЛГБТ-супольнасці. І сцвярджае, што для нашай краіны гэта не свята. А таксама запосціў малюнак на тэму ЛГБТ.
“Сёння над пасольствам Вялікабрытаніі ў чарговы раз вывешаны вясёлкавы сцяг – сімвал людзей з нетрадыцыйнай сэксуальнай арыентацыяй. Менавіта 17 мая прыхільнікі аднаполых адносін вызначылі для сябе нейкай святочнай датай”, – кажа навіна.
Паводле МУС, для нашай краіны гэты дзень значнасці не ўяўляе, а прыярытэт беларускай палітыкі – ахова мацярынства і дзяцінства, абарона інстытута сям’і. “Наша пазіцыя застаецца нязменнай: штучнае раздзіманне тэмы аднаполых адносін дэструктыўна, парушае нормы маралі, вядзе да росту злачынстваў сэксуальнага характару ў дачыненні да дзяцей!”.
Тым часам гродзенцы святкуюць Міжнародны дзень барацьбы з гамафобіяй і абнаўляюць аватаркі праз вясёлкавы фільтр.
