Гродзенская «Цудоўня» гэта пляцоўка, якая займаецца папулярызацыяй і распаўсюдам лакальнай культуры і традыцыі. Каманда пастаянна шукае новыя спосабы іх прасоўвання — і зараз яны робяць гэта праз стварэнне вопраткі.
— Беларуская міфалогія — тэма адкрытая і цікавая, таму людзі не абыякавыя да яе. Кожны любіць казкі, а міфалогія гэта не толькі самі па сабе цікавыя гісторыі, яшчэ яны маюць непасрэднае дачыненне да культуры, лакальнай традыцыі і народнай міфатворчасці.
Як пляцоўка, якая ў першую чаргу займаецца распаўсюдам і папулярызацыяй той самай лакальнай культуры, наша каманда пастаянна шукае новыя спосабы рабіць гэту справу, — распавядае гаспадар крамы Андрэй Несцяровіч.
Цішоткі гэта ўтылітарны і сучасны спосаб масава распаўсюдзіць нейкую інфармацыю. Выявы персанажаў не «заезджаныя» і не «забітыя», пра іх мала хто ведае, яны не на слыху. На такім фармаце вырабу гэта спосаб пазнаёміць многіх людзей з персанажамі беларускай міфалогіі.
Да кожнай цішоткі будзе прыкладацца інфармацыйны буклет з апісаннем, што за істота знаходзіцца на цішотке. Чым больш асобнікаў і цішотак разыйдзецца, тым больш беларусы будуць ведаць пра сваю ўласную міфатворчасць.
Аўтарка малюнкаў - таленавітая, але малавядомая гродзенская мастачка Канстанцыя Калінушкіна.
Зараз зроблены тры жаночыя варыянты: Стрыга, Вадзяніца, Зазоўка і адзін мужчынскі персанаж — Кумяльган.
З іх найбольш вядомая Вадзяніца, якую шмат хто асацыюе з дыснэеўскай Русалачкай, але ў Беларусі гэта зусім іншы персанаж.
Зазоўка — персанаж пра якога не так шмат людзей ведае. Гэта прыгожая лясная жанчына, яна, звычайна распранутая, паказваецца маладым хлапцам у такіх формах і паставах, што ім цяжка перад ёй устаяць. Яна іх кліча за сабой, спявае прыгожыя песні, смяецца залівістым смехам і ў выніку мужчыны, якія за ёй ідуць, не вяртаюцца. Што яна з імі робіць застаецца таямніцай, але напэўна штосці з катэгорыі 18+.
У бліжэйшы час павінен з’явіцца асабліва актуальны для Беларусі персанаж — Апівень. Ужо па самой назве можна зразумець пра што ідзе гаворка.
Цішоткі будуць белага і чорнага колераў, а малюнкі белага і чорнага з чырвоным адценнем.
«Зараз асноўная крыніца інфармацыі гэта энцыклапедычны слоўнік «Беларуская міфалогія», магчыма ў будучыні мы будзем карыстацца іншымі крыніцамі, але за апошні час гэта напэўна найбольш шырокая і дакладная крыніца па гэтай тэме.
Там шмат апісання персанажаў, пра якіх людзі нават не чулі, і вялікая колькасць гэтых істот не мае нейкага графічнага адлюстравання і мы іх не знаходзілі", — тлумачыць каманда «Цудоўні».
Набыць такую цішотку можна будзе ў Этнакраме «Цудоўня» на Кірава, 3. А так сама замовіць праз інтэрнэт і атрымаць поштай у любым месцы Беларусі.
Каманда стваральнікаў плануе распаўсюдзіць цішоткі даволі шырока па Беларусі, бо гэта не толькі лакальная гродзенская міфалогія, а агульнабеларуская.
"Лідскае піва" памяняла фармат тары для брэнда KORONET Lager. Прычына ў адсутнасці патрэбнай тары -…
Гродзенскі рок-гурт 8sonca запісаў трэці музычны альбом. Музыкі прысвяцілі яго каханню і ўнутраным перажыванням. Рэліз…
Валанцёры грамадскай арганізацыі "Адданае сэрца" просяць гродзенцаў дапамагчы з мэбляй. У домік для катоў, які…
Гродзенка купіла клубніцы ў шакаладзе ад кавярні MyLoverBerry і вырашыла пакаштаваць яе на відэа. Дзяўчыну…
Вядучая "Марафону адзінства" Анастасія Кісель, студэнт года і дэлегат Усебеларускага народнага сходу, павінна была атрымаць…
Жыхара Ваўкавыска Леаніда Трафімовіча пачалі судзіць 21 студзеня. Працэс па арт. 370 КК "Здзек з…