Гродзенскія ўрачы-інфекцыяністы распавядаюць пра выпадкі адзёру і як абараніцца ад яго

У абласной інфекцыйнай бальніцы пацвердзілі інфармацыю аб адзёры ў гродзенца, які навучаецца ў адным з універсітэтаў Польшчы. Як паведаміў намеснік галоўнага лекара Арнольд Дайліда, цяпер у раёне горада, дзе прапісаны студэнт, арганізавана медыцынскае назіранне, праводзіцца комплекс супрацьэпідэмічных і прафілактычных мерапрыемстваў па папярэджанні перадачы захворвання. У сакавіку таксама зарэгістраваны выпадак захворвання на адзёр ў Лідзе. Пацыентам інфекцыяністаў стала дзіця, якое вярнулася з Масквы. Яно не было прышчэплена з-за адмовы бацькоў ад вакцынацыі, піша «Гродзенская праўда».

— У мінулым годзе беларускія медыкі зарэгістравалі 254 выпадкі адзёру. Аб эпідэміі гаворкі не ідзе, рэгіструюць асобныя завозные выпадкі, як гэта адбылося ў Гродне і Лідзе. Большасць захварэлых не былі вакцынаваны ад адзёру або вакцынаваны не да канца, то бок зрабілі адну прышчэпку, — адзначае Арнольд Дайліда. — У сувязі з гэтым грамадзяне, якія не прышчэплены, прышчапляліся аднаразова або не маюць звестак аб прышчэпках супраць адзёру, перад выездам за мяжу павінны ў абавязковым парадку атрымаць прышчэпку не менш чым за чатыры тыдні да выезду. Дарослыя могуць прышчапіцца бясплатна ў паліклініцы па месцы жыхарства.

Сёння ёсць магчымасць удакладніць свой прышчэпачны статус. Напружанасць імунітэту (ахоўныя антыцелы супраць адзёру) можна праверыць, даследаваўшы кроў на вызначэнне ўзроўню тытра спецыфічных супрацьадзёнавых імунаглабулінаў G ў прыёмным аддзяленні абласной інфекцыйнай бальніцы па адрасе: г. Гродна, БЛК, 57.

Як зразумець, што ты хварэеш?

Адзёр — вострае інфекцыйнае захворванне, якое характарызуецца ліхаманкай, катаральнымі з’явамі, пляміста-вузельчыкавым сыпам, схільнасцю да ўскладненняў, выкліканым патагеннай і ўмоўна-патагеннай флорай.

Заразіцца ім можна ад ужо хворага чалавека ў катаральны перыяд і перыяд высыпання да 4−5 дзён. Вірус вылучаецца ў навакольнае асяроддзе са сліззю падчас кашлю, чхання і лёгка распаўсюджваецца патокам паветра.

Да ўвядзення супрацьадзёравай вакцыны ў 1963 годзе і шырокага распаўсюджвання вакцынацыі, буйныя эпідэміі адзёру ў свеце адбываліся кожныя 2−3 гады. Яны выносілі да двух мільёнаў жыццяў.

Па стане на 1 лютага 2019 года ў інфармацыі Еўрапейскага рэгіянальнага бюро СААЗ за перыяд са студзеня па снежань 2018 года на адзёр заразіліся 82 596 чалавек у 47 з 53 краін рэгіёну. У 72 выпадках захворванне скончылася смяротна. Вельмі неспрыяльная сітуацыя па адзёру ва Украіне, Грузіі, Албаніі, Чарнагорыі, Грэцыі, Румыніі, Францыі і шэрагу іншых краін. Буйныя ўспышкі адзёру у 2018 годзе рэгістраваліся таксама ў Вялікабрытаніі, Германіі, Бельгіі, Балгарыі, Швейцарыі, Славакіі, Польшчы, Казахстане, а таксама ў краінах іншых рэгіёнаў.

Клініка адзёру першапачаткова падобная з ВРВІ: тэмпература (38- 39 ° С), галаўны боль, кашаль, насмарк, недамаганне, плаксівасць, парушэнне сну. Сімптомы захоўваюцца да трох дзён. Пасля катаральнага перыяду надыходзіць перыяд высыпанняў, якія пераважна пачынаецца на твары, затым тулаве, канечнасцях; этапнасць, як правіла, 3 дні; сып пляміста-вузельчыкавы на нязменным фоне, месцамі зліваецца; не пакідае які-небудзь участак; пакідае пігментацыю («брудная скура») і лушчэнне.

Спецыялісты рэкамендуюць:

• пры планаванні паездак за мяжу удакладніце прышчэпачны статус супраць адзёру ваш і вашага дзіцяці і, пры неабходнасці, зрабіце прышчэпку.
• не трэба рабіць прышчэпку супраць адзёру перад выездам у іншыя краіны, калі ў вас ёсць звесткі аб двух прышчэпках супраць адзёру або вы хварэлі на адзёр (ёсць дакладныя звесткі).
• мэтазгодна зрабіць прышчэпку перад выездам у іншыя краіны, калі вы не хварэлі на адзёр ці ў вас адсутнічаюць дадзеныя аб прышчэпках супраць адзёру або маюцца звесткі толькі пра адну прышчэпку (у асоб ва ўзросце старэйшых за 6 гадоў).
• У выпадку кантакту з хворымі на адзёр, калі не хварэў ёю і не маеш дакументальна пацверджаных звестак аб прафілактычных прышчэпках супраць адзёру, мэтазгодна зрабіць прышчэпку не пазней 72 гадзін з моманту кантакту.
• У выпадку вяртання з паездкі за мяжу і з’яўлення сімптомаў інфекцыйнага захворвання (павышэнне тэмпературы цела, сып, боль у горле, кашаль, кан’юктывіт (запаленне слізістай абалонкі вачэй), варта неадкладна звярнуцца да лекара і акцэнтаваць яго ўвагу на нядаўнім вяртання з замежных краін.