З Пітам Паўлавым і сімвалічным тортам. «Мова Нанова Гародня» адзначыла пяцігоддзе

Нефармальным курсам беларускай мовы ў Гродне споўнілася пяць гадоў. За гэты час іх наведалі сотні гродзенцаў, адбылося каля 200 заняткаў. Адзначыць юбілей прыехаў Піт Паўлаў, музыкант, якія ў розныя часы граў у гуртах «Мроя», N.R.M., KRIWI, Garadzkija, Pete-Paff.

На святочным занятку павіншавалі наведвальнікаў, а госці зрабілі відэавіншаванне для заняткаў. Піў Паўлаў адзначыў, што ён упершыню на «Мове Нанова», але ў Гродне з выступамі быў часта. Адзначыў, што тут самая дысцыплінаваная і прыязная публіка. Але даўно ўжо не прыязджаў і паабяцаў гэта выправіць.

— Мы напісалі дзясяткі вершаў, заспявалі мноства песняў, намалявалі шмат малюнкаў, нагуляліся ў самыя розныя гульні, вывучылі незлічоную колькасць правілаў нашай цудоўнай мовы! Многія са слухачоў сталі нашымі дарагімі сябрамі! — кажуць пра юбілей арганізатары.

Заняткі на «Мове Нанова» складаюцца з фармальнай і нефармальнай частак. На фармальнай можна вывучыць правілы напісання і маўлення. А на нефармальную частку запрашаюць гасцей па пэўных тэмах. Гродзенцы вучылі тэмы рэлігіі, медыцыны, музыкі, палітыкі, спорту, культуры, правоў чалавека, гісторыі і шмат іншых. Дзякуючы «Мова Нанова» да нас завітвалі Лявон Вольскі, Віталь Гуркоў, Яўген Змушка, Алесь Дзянісаў, Данута Бічэль-Загнетава, Аляксандр Куль, Алена Анісім і шмат іншых дзеячоў. У межах «Мова Нанова» праходзілі экскурсіі і заняткі для дзяцей. А лепшыя навучэнцы атрымлівалі прыемныя падарункі ў выглядзе кніг і нататнікаў.

Калі запытаць у наведвальнікаў, навошта ім курсы, найперш яны адказваюць: каб было з кім паразмаўляць на беларускай мове. Слухачы кажуць, што будзе добра, калі курсы скончацца. Але толькі па той прычыне, што ўсе-ўсе будуць размаўляць па-беларуску.