18 сакавіка стала вядома, што ўлады далі дазвол на правядзення “Свята Незалежнасці” ў Гродне ў Каложскім парку. Распачаўся збор сродкаў на свята: расказваем, як яго падтрымаць.
Свята адбудзецца 23 сакавіка з 13.00 да 17.00 з канцэртам, прамовамі, майстрамі і сцягамі.
– На сённяшні дзень вядома, што адмоўлена ў правядзенні акцыі ў Менску. Таму фактычна ў Гародні будзе цэнтральнае мерапрыемства па ўсёй Беларусі. Таму мы з задавальненнем запрашаем усіх беларусаў на святкаванне з 13.00 да 17.00 у Каложскім парку, – кажа Вадзім Саранчукоў з Партыі БНФ.
– Гэта можа стаць добрай традыцыяй і файным прыкладам унутранага турызму, калі мы ўсе разам паедзем у Гародню, як ездзілі ў Вільню на Вольскага і Ляпісаў, ці ў Гомель на першы канцэрт Brutto, – піша Павел Белавус Укантакце.
Дапамагчы святу можна фінансава:
- пакінуўшы ахвяраванне ў Гродне ў крамах “Адметнасць” ці “Цудоўня” на Кірава,3;
- звязаўшыся з любым з арганізатараў па тэлефонах ці ў месенджэрах: Вадзім +375296540534, Зміцер +375295852585, Андрэй +375336232616, Сяржук +375295082082
- пералічыўшы любую суму на картку: 5351 0410 1711 9981 , дзейсная да 01\21, уладальнік VADZIM SARANCHUKOU
- звязаўшыся па электроннай пошце [email protected].
- праз збор сродкаў на сайце https://bnr.by.
Таксама арганізатары просяць аб рэпостах і валанцёрскай дапамозе. “Патрэбны галовы і рукі для распаўсюду флаераў-запрашэнняў, арганізацыі пляцоўкі, дружыны на само мерапрыемства”, – пішуць яны.
Запланавана вялікае святкаванне
Канцэрт, выступы, месцы, дзе можна будзе пачаставацца і бавіць час дзецям, фотазона. “Месца, дзе будзе прыемна сустрэцца ўсім, хто адчувае ў гэты дзень свята”, – кажуць арганізатары. У іх засталіся кантакты з мінулага года як з кропкамі харчавання, так і з фірмамі, якія арганізоўвалі дзіцячую пляцоўку, майстрамі, якія прадавалі свае рэчы. Таму арганізатары кажуць, што нават за пяць дзён паспеюць зрабіць свята.
Дазволена зарэгістраваная сімволіка і сімволіка, датычная тэматыкі мерапрыемства. Як і летась, плануецца арганізаваць службу ў Каложскай царкве.
Музычная праграма будзе абвешчана пазней. Вядома, што ёсць дамовы з некаторымі гродзенскімі і не толькі музыкантамі. Абяцаюць “зорны” склад выступоўцаў.
