Новыя правілы пачалі дзейнічаць у грjдзенскай гімназіі імя Яўхіма Карскага. У дзяцей перад урокам забіраюць тэлефоны, дазваляюць карыстацца імі толькі на перапынках.
Як стала вядома С**бодзе, новаўвядзенне пачало працаваць з пачатку сакавіка.
Правілы карыстаньня мабільнымі тэлефонамі зьявіліся на сайце гімназіі. Яны датычаць як вучняў, так і настаўнікаў і іншых супрацоўнікаў навучальнай установы.
Сьцісла
- у будынку гімназіі выклік павінен быць толькі ў вібрарэжыме або вельмі ціхі;
- карыстацца тэлефонам падчас урокаў забаронена. Лічыць на ім, напрыклад, як на калькулятары, можна, але толькі з дазволу настаўніка;
- на перапынках вучні могуць званіць толькі бацькам або іншым родным дзеля «апэратыўнай сувязі» і «толькі ў выпадках абгрунтаванай і неадкладнай неабходнасьці»;
- настаўнікам па-за ўрокамі таксама ня раяць карыстацца тэлефонам у прысутнасьці вучняў;
- у гімназіі і побач зь ёй варта размаўляць па тэлефоне ціха і коратка, каб не перашкаджаць іншым;
- здымаць на тэлефоны фота і відэа можна толькі з дазволу пэдагогаў і таго, хто трапляе ў кадар;
- нельга прапагандаваць праз мабільнік жорсткасьць, гвалт, парнаграфію, песьні і вершы з лаянкай;
- забаронена наўмысна наносіць шкоду іміджу гімназіі;
- нельга зараджаць у гімназіі мабільны тэлефон ад электрасеткі.
Што будзе, калі нехта парушыць правілы?
На парушальніка складуць дакладную запіску. Вучню будзе пагражаць папярэджаньне, запіс у дзёньніку, паведамленьне або выклік бацькоў у школу, настаўнікам — заўвага, вымова.
Калі гімназіст моцна парушыць правілы, настаўнік або гімназічнае кіраўніцтва могуць забраць у яго тэлефон і аддаць толькі бацькам.
Ва ўнутраных правілах ёсьць спасылка на артыкул 126 Кодэксу аб адукацыі.
Дырэктар: «Перашкаджаюць на ўроках»
Дырэктар горадзенскай гімназіі № 1 імя акадэміка Яўхіма Карскага Барыс Сяброўскі сказаў, што правілы карыстаньня мабільнымі тэлефонамі прыняла апякунская рада гімназіі, у якую ўваходзяць бацькі вучняў. Ініцыятыва належыць самой установе, рэкамэндацый «зьверху» не было.
Прычына забароны карыстацца мабільнікамі — «перашкаджаюць на ўроках, адцягваюць увагу дзяцей».
Як патлумачыў Барыс Сяброўскі, у клясах на стале настаўніка стаяць адмысловыя скрынкі з нумарамі. Перад пачаткам уроку школьнік кладзе туды свой тэлефон, а пасьля ўроку можа забраць. Настаўніку таксама нельга размаўляць праз тэлефон падчас уроку. Свой гаджэт ён можа пакласьці ў тую самую скрыню або проста на стол.
Тэлефоны зьбіраюць у скрыні перад урокам і аддаюць на перапынках
На пытаньне, што будзе з тымі, хто не захоча здаваць свае тэлефоны, дырэктар гімназіі запэўніў, што ў іх такога не бывае.
«Як гэта ня хоча? Правілы ўнутранага распарадку ён (вучань) павінен выконваць па Статуце гімназіі. У нас такіх выпадкаў няма і ня будзе», — сказаў Сяброўскі.
Па словах дырэктара, бацькі гімназістаў ведаюць пра новаўвядзеньне.
Мінадукацыі: «Рашэньне прымае адміністрацыя школы»
Прэсавая сакратарка Міністэрства адукацыі Людміла Высоцкая сказала С**бодзе, што рашэньне, ці можна карыстацца мабільнымі тэлефонамі ў школе, прымае адміністрацыя школы.
«Ва ўсіх краінах Эўразьвязу даўно гэта зрабілі. І ніхто не абураецца. Дазваляецца карыстацца тэлефонам ці айфонам у тым выпадку, калі ён неабходны для навучальнага працэсу», — сказала Людміла Высоцкая.
Юрыст: «Нормы не грунтуюцца на заканадаўстве»
Юрыст і сузаснавальнік праваабарончай арганізацыі Human Constanta Аляксей Казьлюк сказаў С**бодзе, што дакумэнт (правілы карыстаньня мабільнымі тэлефонамі) сумнеўны зь некалькіх прычын:
- зь яго не відаць, калі ён прыняты і кім;
- там напісана, што правілы распаўсюджваюцца на супрацоўнікаў гімназіі, але дакумэнт чамусьці стварае абавязкі для вучняў;
- заканадаўства не забараняе ствараць ва ўстанове адукацыі ўнутраныя правілы, але гэтыя правілы павінны быць прынятыя і аформленыя належным чынам і не павінны супярэчыць заканадаўству.
Напрыклад, нормы, па якіх адміністрацыя можа забіраць тэлефоны ў вучняў, хай нават і часова, не грунтуюцца на заканадаўстве. У кодэксе аб адукацыі няма такіх дысцыплінарных спагнаньняў, як часовае адбіраньне маёмасьці. Паводле артыкула 128 Кодэксу аб адукацыі, да дысцыплінарных спагнаньняў адносяцца заўвага, вымова і адлічэньне.
Калі казаць пра адбіраньне маёмасьці (тэлефонаў) як прафіляктыку, то ў Кодэксе аб адукацыі няма нічога пра прафіляктыку парушэньня лякальных нарматыўных актаў, а да прафіляктыкі злачынстваў і правапарушэньняў гэта ня мае дачыненьня.
Карыстацца тэлефонамі дзецям забараняюць і за мяжой
Мабільныя тэлефоны забараняюць ня толькі беларускім школьнікам. Як піша T*t.by, імі нельга карыстацца прынамсі ў школах Нямеччыны і Францыі. Некаторыя настаўнікі гэтаксама перад заняткамі зьбіраюць тэлефоны ў скрыню і ставяць яе так, каб дзіця бачыла. Калі ў францускай школе дзіця ўключыць мабільны тэлефон, то яго забяруць і аддадуць толькі бацькам.
