Вядомая гарадзенская піцэрыя GoGo Pizza на вуліцы Карла Маркса, 10 апынулася пад пагрозай закрыцця. З-за новых амерыканскіх печаў для піцы ў суседніх дамах мігоча асвятленне. Энерганагляд прадпісаў ліквідаваць перашкоды, але ў кафэ кажуць, што не ведаюць, як гэта зрабіць, піша «Вячэрні Гродна».
Выдаткавалі 22 тысячы долараў
Вясной 2018 года ў піцэрыі GoGo Pizza вырашылі замяніць старыя печы на канвеерныя вытворчасці ЗША — у такіх піца не прыгарае і прапякаецца з усіх бакоў. Узялі крэдыт і заплацілі за новае абсталяванне 11 тысяч долараў. Печ спадабалася, таму кіраўніцтва купіла яшчэ адну.
Аднак у піцэрыі сталі мігацець святлодыёдныя лямпы. Іх замянілі на абароненыя ад пульсацыі прыборы, што вырашыла праблему. Неўзабаве падобныя перашкоды заўважылі ў суседняй краме. «Мігаценне» распаўсюдзілася на жылыя дамы па суседстве. Лабараторыя энерганагляду правяла замеры: выявілася, што пульсацыя ідзе ад амерыканскіх печаў.
— Святло ў пакоях пачаў «гуляць» з мінулага снежня. Думалі, што гэта толькі ў нашай кватэры, але ў суседзяў было сапраўды гэтак жа. Знаходзіцца ў пакоі псіхалагічна немагчыма. Замянілі лямпы на люмінесцэнтныя, і ўсё спынілася, — тлумачыць жыхарка аднаго з суседніх дамоў Марына.
Замена лямпачак праблему не вырашыць
Энерганагляд выдаў прадпісанне ліквідаваць парушэнні. Трэба было ўсталяваць дросельны фільтр, але пасля яго мантажу нічога не змянілася. У піцэрыю запрашалі профільных спецыялістаў, а дырэктар звяртаўся па дапамогу ў расійскія НДІ і ВНУ. Але ніхто не даў дакладнага рашэння.
— Я абышоў жыхароў і ўбачыў, што ў кожным доме мігцела святло. Думаў, што можна замяніць у кватэрах лямпачкі за свой кошт, але зразумеў, што гэта як ставіць тазікі, калі цячэ дах. Трэба ліквідаваць прычыну, а не наступствы, — кажа дырэктар Андрэй Вялента.
На яго думку, у будучыні ўсё больш піцэрый будуць пераходзіць на канвеерныя печы, і любая іншая ўстанова грамадскага харчавання ў краіне можа сутыкнуцца з такой з’явай.
— Вядома, прасцей за ўсё адключыць нас ад сеткі. Але застаюцца пытанні. Праз што канкрэтна ідуць перашкоды? Якую менавіта абарону трэба ставіць, дзе знайсці неабходнае абсталяванне? Не хачу вінаваціць энерганагляд, але яны не даюць рэкамендацый, як выправіць сітуацыю, — разважае дырэктар піцэрыі.
Ва ўстанове цалкам памянялі электрыку на больш магутную. Збіраюцца замяніць кабель ад сілкавальнай падстанцыі да кавярні. Як варыянт могуць вярнуць старыя печы. Аднак з пункту гледжання іміджу гэта адкіне піцэрыю на некалькі крокаў назад. Атрымліваецца, што і 22 тысячы долараў выкінутыя на вецер.
Энерганагляд: «Печы могуць быць бракаванымі»
У філіяле «Энерганагляд» РУП «Гроднаэнерга» адзначылі, што калі парушэнні не ліквідуюць, кавярню могуць адключыць ад сеткі: праз аднаго спажыўца пагоршылася праца прыбораў у іншых абанентаў.
— Дырэктару загадана звярнуцца ў праектную арганізацыю для распрацоўкі праектнага рашэння, — паведаміў інспектар энергоинспекции па Кастрычніцкім раёне Гродна Мікалай Красоўскі. — Не выключана, што праблема ў печах, якія могуць быць бракаванымі. У такім выпадку іх можна замяніць па гарантыі ў пастаўшчыка.
Паводле яго слоў, работнікі энерганагляду не маюць права называць найменні прыбораў і дзе іх купіць, бо іх могуць абвінаваціць у лабіяванні інтарэсаў пэўных фірмаў.
https://hrodna.life/2019/02/20/kuznechiki/
