На ўязную браму Старога замка павесілі барэльеф анёла з крыламі

Маскарон у выглядзе анёла з крыламі з’явіўся на ўязной браме Старога замка 17 лютага. Хутка на аб’екце пачнецца ўстаноўка і іншых мастацкіх элементаў.

Гродзенскае прадпрыемства «Будоўля» ў сярэдзіне снежня мінулага года выйграла тэндар па вытворчасці і мантажы каменных элементаў на Старым замку. За рэалізацыю праекта ўзялося адно з падраздзяленняў прадпрыемства — камнеапрацоўчы завод. Там адмыслова была створана брыгада з высокакваліфікаваных спецыялістаў.

Мантаж мастацкіх элементаў на ўязной браме Старога замка пачаўся ў канца 2018 года

«Да нядаўняга часу мы вешалі карнізы, а ў нядзелю павесілі на браму анёла, — распавядае дырэктар „Будоўлі“ Павел Бузук. — На прадпрыемстве цяпер вырабляем чарговыя карнізы. Важна не затрымліваць будаўнікоў і таму паралельна з імі робяцца ўсе нашы вырабы. У бліжэйшы час прыступім да вонкавай аркі ўязной брамы. Там будуць тры гербы».

Як распавялі Hrodna.life на прадпрыемстве, мастацкія элементы ствараюцца паводле сабраных матэрыялаў архітэктараў і праекціроўшчыкаў рэканструкцыі Старога замка. Нагадаем, за аснову рэканструкцыі ўзяты замак часоў караля Стэфана Баторыя, як лічыцца, працы вядомага італьянскага архітэктара Санці Гучы. Хоць, гісторыкі да гэтага часу не ўпэўнены, хто менавіта быў аўтарам праекта замка.

Эскізны праект рэканструкцыі распрацаваў мінскі архітэктар Уладзімір Бачкоў, які ў 80−90-я гады мінулага стагоддзя займаўся перадпраектнымі даследаваннямі. Па ходзе першай чаргі рэканструкцыі (брама-вежа і сцяна над Нёманам) праект Бачкова мяняўся і дапрацоўваўся.