Жыхару Мазыра Уладзіславу Шавяленку прысудзілі 8 гадоў калоніі з канфіскацыяй маёмасці. Ён стварыў фінансавую піраміду і прыцягнуў звыш 760 тысяч рублёў ад больш як 900 чалавек, піша «Радыё С**бода».
Прысуд вынес Гродзенскі абласны суд 28 снежня. Ён яшчэ не ўступіў у законную сілу.
Хто фігурант справы?
Уладзіславу Шавяленку 23 гады. Ён з Мазыра.
Калі арганізаваў фінансавую піраміду?
Піраміда дзейнічала з лютага 2015 да красавіка 2016 году.
Чым завабліваў?
Паводле следчых, Шавяленка стварыў праект New Assets Union («Новы саюз актываў»), які нібыта добра зарабляў на ўдзеле ў бінарных апцыёнах і букмэкерскіх біржах, аптовых продажах тавараў з Кітаю і здачы ў арэнду нерухомасці.
У праект ён завабліваў абяцаннямі даходу да 300 працэнтаў у месяц. За прыцягненне новых укладчыкаў абяцаў узнагароды. За 100 чалавек — iPhone, за 500 — MacBook, за 1000 — 10 тысяч даляраў.
Як насамрэч працавала схема?
Як класічная фінансавая піраміда — працэнты папярэднім удзельнікам выплачваліся з грошай наступных. У рэчаіснасці «Новы саюз актываў» не вёў ніякай гаспадарчай дзейнасці.
Але, каб стварыць бачнасць актыўнасці і сфармаваць станоўчы імідж праекту, малады чалавек
- размяшчаў інфармацыю пра нібыта зробленыя выплаты адсоткаў укладчыкам;
- праводзіў індывідуальныя і групавыя сустрэчы, семінары ў Мінску, Магілёве і Гродне;
- запрашаў людзей у арандаваны офіс на праспекце Пераможцаў у цэнтры Мінску, кавярні і канферэнц-залі вядомых гатэляў;
- заключаў дамовы ад імя кампаніі New Assets Union LP, зарэгістраванай у Вялікай Брытаніі ў лістападзе 2015-га.
Грошы інвестараў пералічваліся на рахункі ў Беларусі і Латвіі, адкрытыя на Шавяленку і іншых людзей, якія кажуць, што не ведалі пра злачынную схему.
Хто пацярпеў?
Каля 900 чалавек, пераважна моладзь, большасць — з Гродзенскай і Брэсцкай абласцей.
