З 27 снежня пачалася падрыхтоўка да рэканструкцыі старога дома на Вялікай Траецкай, 47. На працягу некалькіх гадоў там з’явіцца гасцініца з уласным броварам.
Дом на Вялікай Траецкай, вядомы як «крывы», некалькі гадоў пуставаў і быў на мяжы зносу. У 2017 годзе ўласнік — чайны дом «ЧайКоффский» — вырашыў перабудаваць камяніцу пад гасцініцу з броварам і офісамі. Пад канец 2018 года на аб’екце пачаліся першыя падрыхтоўчыя працы.
«Планы застаюцца ранейшыя, толькі да гасцініцы дадамо яшчэ трохі офісаў. Паводле праекта будынак не цалкам будзе разбірацца, застаецца фасадная сцяна. Але трэба разумець, што дом аварыйны і не выключана, што яго давядзецца разабраць цалкам. У кожным разе гістарычны выгляд будынка захаваецца», — расказаў Hrodna.life заснавальнік чайнага дома «ЧайКоффский» Зміцер Рыхліцкі.
Першая чарга рэканструкцыі аб’екта павінна працягнуцца на 13 месяцаў. Па другой яшчэ няма дакладнай інфармацыі. Падчас земляных працаў будуць працаваць і археолагі. Старая цэгла будзе выкарыстоўвацца другаразова.
Даведка
Дом па вуліцы Вялікай Траецкай (некалі ён належаў да вуліцы Крывой) быў пабудаваны напачатку XX стагоддзя. Пабудова здолела захаваць свой цікавы першапачатковы выгляд. Галоўным упрыгожаннем «крывога» будынка было спалучэнне характэрнай гродзенскай цэглы з жоўтай гліны з чырвонымі ўстаўкамі над вокнамі і ўваходам.
Гарадзенскі гісторык Андрэй Чарнякевіч пісаў, што апошнія ацалелыя жыхары гэтага раёна хаваліся на гарышчах. «Тут зроблены невялікі фальшывы дах з маленькай уваходнай адтулінай трохкутнай формы з аднаго боку, з іншай — канец піраміды, даўжыня 4−5 метраў, тут жывуць 4 дарослых і 2 дзяцей», — пісаў пра адзно з такіх сховішчаў невядомы аўтар дзённіка, знойдзенага на руінах гета пасля вайны. Сёння гэты дом — фактычна апошні напамінак пра некалькі пакаленняў гродзенцаў.
