Паласу перашкод для маленькіх ратавальнікаў адкрылі ў Гродне

Спартыўна-гульнявая пляцоўка, якая дазваляе ў гульнявой форме азнаёміцца з асновамі бяспекі, адкрыта на базе «Маўглі-парку» ў гандлёвым цэнтры «Карона» па вуліцы Горкага. Тут дзецям дадуць магчымасць пабыць у ролі выратавальнікаў, пераадолець некалькі перашкод, напрыклад, падняцца па сцяне, прабрацца праз балота, піша БЕЛТА.

Кожны атракцыён ніндзя-парку «Маленькі выратавальнік» ставіць рабят прыблізна ў тыя ўмовы, у якіх работнікі МНС нярэдка аказваюцца ў рэальным жыцці. Скаладром зроблены ў выглядзе дома, у якім нібыта палае пажар, — гэта можна зразумець па мігатлівых акенцах. Задача дзяцей дабрацца да кожнага па лесвіцы і «затушыць агонь» націскам кнопкі.

Што з задымленага памяшкання трэба выбірацца паўзком, навучыць атракцыён, які імітуе напоўненую дымам кватэру. Прыёмы пошуку людзей у балоцістай мясцовасці дзеці апрабуюць, пераадольваючы штучныя купіны, а таксама навучацца трымаць баланс пры праходжанні падвеснага моста.

— На скаладроме кожнае дзіця страхуем індывідуальна, выпадкі падзення выключаныя. На паласе перашкод прадугледжана гімнастычная страхоўка — мяккія кубікі, — распавёў «Гродзенскай праўдзе» прадстаўнік парку Мікалай Паўлюкевіч.

Для аўтэнтычнасці і бяспекі дзецям апранаюць каскі, на якіх, дарэчы, пазначаны нумары службы выратавання «101» і «112». Яшчэ шмат іншых момантаў ненадакучліва ў гульнявой форме нагадваюць дзецям асноўныя правілы бяспекі жыццядзейнасці.

— Выхаванне ў падрастаючага пакалення культуры бяспечных паводзін — наша прыярытэтная задача. Такія аб’екты спрыяюць яе рашэнню: тут у гульнявой форме пры дапамозе інструктараў дзеці змогуць не толькі цікава правесці час, але і павысіць узровень ведаў, атрымаць навыкі правільных дзеянняў у той ці іншай сітуацыі, больш даведацца аб прафесіі выратавальніка, — адзначылі ў Гродзенскім абласным упраўленні МНС.

Новая пляцоўка стала 18-м па ліку іміджавым аб’ектам МНС у рэгіёне. У розных раёнах вобласці на базе найбольш наведвальных аб’ектаў - гандлёвых цэнтраў, кінатэатраў - ствараюцца тэматычныя пакоя, гульнявыя і спартыўныя пляцоўкі.