У судзе Ленінскага раёна Гродна пачаліся папярэднія слуханні па справе Анатолія Мышкевіча супраць гарвыканкама. Грамадскі актывіст прапанаваў гарвыканкаму трансляваць пасяджэнні мясцовых дэпутатаў. Гарвыканкам напісаў адмову і цяпер актывіст дайшоў да суда, піша Беларускае Радыё Рацыя.
Анатолій Мышкевіч зрабіў прапанову некалькі месяцаў таму, спасылаючыся на артыкул 34 Канстытуцыі Рэспублікі Беларусь, які гарантуе ўсім грамадзянам права на атрыманне і захоўванне інфармацыі пра дзейнасць дзяржаўных органаў.
— Гарадзенскі гарвыканкам адмовіў мне ў маім законным праве атрымліваць поўную інфармацыю пра працу дзяржаўных органаў. Іх адказ я абскардзіў у аблвыканкаме, які ў сваю чаргу таксама не знайшоў ніякіх парушэнняў у адказе. Я склаў скаргу, падаў яе ў суд, у судовым парадку праходзіла апытанне асобаў, то бок заяўніка і адказчыкаў. Мы выказалі свае меркаванні па гэтай справе. Гарвыканкамам было пададзена прашэнне пра спыненне справы, — тлумачыць Анатолій.
Папярэдняе слуханне па працэсу Анатоля Мышкевіча працягнецца 6-га снежня, а 14.30 у судзе Ленінскага раёна Гродна. Працэс вядзе суддзя Казімір Сяргей.