Афіцыйна «Нёман» не паведаміў аб расставанні з камерунцам Абуной, але футбаліст даў зразумець, што супрацоўніцтва з гродзенцамі на сённяшні дзень у яго скончана і гэта нягледзячы на тое, што кантракт у футбаліста з клубам быў разлічаны да 2019 года.
У «Нёмане» распавялі Hrodna.life, што клуб растаўся з футбалістам па ўзаемнай згодзе абодвух бакоў, а афіцыйная інфармацыя з’явіцца ў бліжэйшы час.
Нагадаем, камерунец Жан-Патрык Абуна штогод, пачынаючы з 2010 года, спрабаваў перабрацца ў Еўропу, але знайсці клуб яму ніяк не атрымлівалася. Толькі ў 2017 годзе афрыканец з дапамогай свайго сябра Бебе, які ўжо на той момант два сезоны выступаў у «Нёмане», здолеў трапіць у Беларусь. I толькі з другой спробы футбалiст здолеў зрабіць уражанне на трэнерскі штаб жоўта-зялёных. Пасля перадсезоннай падрыхтоўкі, ён стаў асноўным гульцом складу гродзенскай каманды.
У мінулым сезоне футбаліст згуляў у 28 матчах за «Нёман», правёўшы на полі 2430 хвілін. Гэта быў адзiн з найлепшых паказчыкаў сярод гульцоў гродзенскай дружыны за 2017 год i нават кіраўніцтва клуба прапанавала яму новы кантракт. У тым сезоне камерунец большую частку гульняў правёў на пазіцыі крайняга левага абаронцы, а ў канцы чэмпіянату заняў месца ў цэнтральнай зоне абароны. На апошняй пазiцыi ў новым сезоне ён і пачынаў гуляць, але гэта прывяло да не вельмі ўпэўненых вынікаў і страты месца ў асноўным складзе.
Вядома, што ў апошнім матчы сезона — 2018 у якiм «Нёман» у Гродне будзе прымаць «Дынама-Брэст», Абуна на поле ўжо не выйдзе.
