Дзіцячая турбаза «Мелавыя горы» на беразе Нёмана сёлета засталася без ацяплення. У рэдакцыю Hrodna.life звярнуўся чытач Ігар, які хвалюецца, што праз гэта аб’ект закрыецца.
«Усё жыццё яна працавала, а ў гэтым годзе прыехала праверка і абрэзалі ўсе батарэі: нібыта не па нормах, патрэбен асобны будынак кацельні. Вартаўнікі сядзяць без ацяплення. Што будзе далей — можна толькі здагадвацца. Вядома, у бюджэтнай арганізацыі няма сродкаў для пабудовы асобнай кацельні», — напісаў наш чытач. Ён хвалюецца, што маляўнічае месца можа ў выніку быць прададзена прыватніку.
Дзіцячая турбаза «Мелавыя горы» гэта два невялікія драўляныя будынкі. Іх пабудавалі ў сярэдзіне 20 ст. Сёння турбаза належыць дзяржаўнай установе адукацыі «Гродзенскі абласны цэнтр турызму і краязнаўства».
Тут рыхтуюць чэмпіёнаў: сёлета хлопцы, якія рыхтаваліся на турбазе, занялі першае месца на чэмпіянаце Еўропы па тэхніцы пешаходнага турызму. Апроч гэтага выхаванцы турбазы займаюць прызавыя месцы на абластных і рэспубліканскіх спаборніцтвах па спартыўным арыентаванні.
Таксама на турбазе праводзяцца велазаезды з перашкодамі, сплавы на байдарках, тут займаюцца спартыўнай рыбалкай і скалалазаннем.
Але зараз месца засталося без ацяплення. У кіраўніцтве турбазы расказалі, што праблемы ўзніклі таму, што сістэма ацяплення не адпавядае сучасным нормам супрацьпажарнай бяспекі. Паводле заключэння Дзяржпрамнагляду кацёл не павінен знаходзіцца ў памяшканні. Кацельня павінна месціцца ў асобным будынку.
Нягледзячы на адсутнасць ацяплення турбаза працягне працаваць. «Асноўная частка мерапрыемства адбываецца ў цёплы перыяд, — кажа дырэктар Андрэй Лунін. — Удзельнікі турзлётаў жывуць ў намётах». Апошні турзлёт ладзілі падчас восеньскіх вакацый — літаральна тры тыдні таму.
Хоць турбаза і пабудавана ў сярэдзіне мінулага стагоддзя, кіраўніцтва ўсімі сіламі падтрымлівае яе ў належным стане і па магчымасці ўзводзіць нешта новае. Гэта робіцца не толькі за грошы, вылучаныя бюджэтам, але і за пазабюджэтныя сродкі, якія атрымліваецца зарабіць.
Летась на тэрыторыі турбазы замянілі электраправодку, паставілі энергазберагаючыя лямпы. У 2013 старыя драўляныя вокны замянілі на шклопакеты. На тэрыторыі пабудавалі вялікую бяседку.
Аднак на будаўніцтва кацельні грошай няма. «Мы спадзяемся, што грошы знойдуцца і ацяпленне вернецца. Магчыма, перайдзем на абагрэў ад электрычнасці», — кажа дырэктар Андрэй Лунін. Нават калі на тэрыторыі нічога не праводзілася, то ацяпленне ў турбазе раней заўсёды працавала: трэба падтрымліваць мінімальную тэмпературу, каб будынкі лепш захоўваліся. Сёння на тэрыторыі турбазы застаецца працаваць вартаўнік і яго пакой акурат ацяпляецца электрычным абагравацелем.
Планаў пазбаўляцца ад турбазы, напрыклад праз продаж, зараз няма.
У траўні беларусы сталі актыўна абмяркоўваць знікненне бульбы з паліц у крамах. Звярнулі ўвагу і…
Гарадское і сельскае насельніцтва Беларусі скарачаецца. Згодна з Белстатам, у Гродне і Лідзе сітуацыя выглядае…
Сцэнічны комплекс на святкаванне Дня Перамогі ў Гродне 9 траўня абыйдзецца гарадскому бюджэту ў 12…
Непаўналетняга падлетка з Гродзенскага раёна спрабавалі прыцягнуць да адміністрацыйнай адказнасці за распіццё алкаголю ў грамадскім…
Салон прыгажосці Mateo запусціў праект «Незвычайная маці». Паўдзельнічаць у ім могуць жанчыны, якія выхоўваюць дзяцей…
Гродзенскі гісторык Мечыслаў Супрон вызначыў, з якога ракурсу Напалеон Орда зрабіў адзін са сваіх гродзенскіх…