Ліга чэмпіёнаў: «Нёман» прайграў заключны матч «Айсбарэну» і заняў апошняе месца ў групе

Нягледзячы на ​​тое, што матч у Гродне 16 кастрычніка нічога не вырашаў, супернікі прадэманстравалі баявую гульню у якой мацней апынуўся клуб з Берліна.

Госці пачалі актыўна і ўжо на 2-й хвіліне адкрылі лік у матчы, дзякуючы дакладнаму кідку Фiшбуха. Гаспадары здолелі зраўняць лік толькі праз 10 хвілін, калі браты Маляўкі ў меншасці стварылі класную контратаку і распячаталі вароты немцаў. Вызначыўся Сяргей Маляўка.

У другім перыядзе каманды таксама закінулі па шайбе. На гэты раз першым забіў «Нёман». Шайба Арлова на 25-й хвіліне вывела гродзенцаў наперад. Але за 5 хвілін да другога перапынку госці зраўнялі лiк, дзякуючы шайбе Хайсэра.

Заключная дваццаціхвілінка прайшла пад дыктоўку «Айсбарэна». Госці здолелі яшчэ двойчы трапіць у вароты гродзенцаў, і двойчы далёкімі ўдарамі. Вызначыліся Бакман на 52-й хв. i Нэбельс на 57 хв. А вось «Нёману» вызначыцца больш так так і не атрымалася.

«Нёман» — «Айсбарэн» — 2:4 (1:1, 1:1, 0:2)

Пасля чарговай паразы ад «Айсбарэна» гродзенцы апусціліся ў сваёй групе на апошняе месца. «Нёман» не выканаў пастаўленую кіраўніцтвам задачу і застаўся за бортам плэй-оф ЛЧ.

Група «D»: «Цуг» — 13 ачкоў (5 гульняў), «Камета» — 9 (5), «Айсбарэн» — 6 (6), «Нёман» — 5 (6).