Якія парушэнні знаходзяць спецыялісты на гродзенскіх рынках, дзе гандлююць гароднінай і садавінай

Знайсці на рынках гародніну і садавіну прама з градкі або толькі што прывезеныя з сонечных краін і па даступнай цане можна без цяжкасцяў. У якасці прадуктаў, выстаўленых на продаж, прадпрымальнікі не сумняюцца. А вось ва ўрачоў-гігіеністаў ёсць пытанні. Маніторынгі рынкаў і гандлёвых кропак паказваюць: з году ў год парушэнні аднолькавыя, распавядае тэлеканал «Гродна Плюс».

Пры выглядзе відэакамер і камісіі з лекараў-гігіеністаў практычна ўсе, хто прадае па-за прылаўкам, ды і некаторыя з тых, хто гандлюе з прылаўкаў, закрываюць свае працоўныя месцы, спасылаючыся на звычайны перапынак. У чым сапраўдная прычына такіх паводзінаў, сказаць складана. Але ў добрасумленных прадаўцоў гэтага рынку ёсць свая версія.

— Таму што прадаюць не свой тавар. У мяне свой, чаго мне ўцякаць? Можаце прыехаць у вёску, я вам усё пакажу. А людзі ўцякаюць, таму што бяруць дзесьці на аптовым рынку, а некаторыя і па гародах лазяць, прыходзяць брудныя па раніцах, — кажа прадавец Мікалай Язерскі.

Тым, хто ўпэўнены ў свежасці і якасці свайго прадукту, баяцца няма чаго. Прадаўцоў за прылаўкамі пад навесам не палохае ні камера, ні праверкі. Сабіна Унаровская гандлюе гароднінай і садавінай на гэтым месцы вось ужо 17 гадоў. Кожны сезон прыязджае з Сапоцкіна. Ураджай з яе градак палюбіўся гродзенцам. Пастаянных кліентаў хапае, атрымлівае заказы на зіму, таму ў якасці сваіх прадуктаў ўпэўненая сама, ды і дакументы ў яе ўсё маюцца.

www.youtube.com/watch?v=6OYdcXb6PME

Рынкі прыцягваюць нізкімі цэнамі, і прынята лічыць, што тут заўсёды ўсё свежае і, што называецца, хатняе. Ці так гэта? Свой вердыкт выносяць спецыялісты з цэнтра гігіены і эпідэміялогіі. Яны рэгулярна правяраюць кропкі з прадуктамі і гандлёвыя цэнтры. Кажуць, без парушэнняў не абыходзіцца. Толькі за гэты год было праверана 921 месца продажу. Бракаванай прадукцыі выяўлена 224 факту, з мінулым тэрмінам — 178, з парушэннямі тэмпературнага рэжыму — 139.

— Асноўнымі парушэннямі з’яўляюцца: адсутнасць маркіровачных цэтлікаў з інфармацыяй, якая наносіцца ў адпаведнасці з патрабаваннямі тэхнічных рэгламентаў Мытнага саюза, адсутнасць дакументаў, якія пацвярджаюць якасць, таксама парушаюцца тэмпературныя рэжымы і ўмовы захоўвання харчовых прадуктаў, кажа лекар-гігіеніст Гродзенскага занальнага цэнтра гігіены і эпідэміялогіі Галіна Самбурова.