У Гродне 5 мая матчам “Варвараў” і “Ураганаў” стартаваў першы ў гісторыі Беларусі чэмпіянат па амерыканскім футболе. Першая гульня для гродзенскай каманды скончылася паразай. На сваім полі “Варвары” прайгралі мінскай камандзе з лікам 40:7.
У выхадны дзень падтрымаць “Варвараў” на старце чэмпіянату прыйшла вялікая колькасць гродзенцаў, але нават падтрымка родных сцен не дапамагла камандзе Аляксея Серабракова абыграць суперніка. Гродзенцы адразу прайгралі старт матчу і адыграцца ў ходзе гульні ім было ўжо вельмі праблематычна.
Чэмпіянат Беларусі, у якім удзельнічаюць чатыры каманды, будзе праходзіць па кругавой сістэме, дзе ўсе супернікі згуляюць адзін з адным. Па выніках рэгулярнага сезону вызначацца пасевы для стадыі плэй-оф. Першая каманда ў турнірнай табліцы прыме на сваім полі чацвёртую, а другая – трэцюю. Фінал пройдзе 14 ліпеня ў Гродне.
Наступны матч “Варвары” правядуць у Віцебску 26 мая, дзе сустрэнуцца з мясцовымі “Рысямi”.
