Пасля працяглай серыі з нічыіх, каманда Ігара Кавалевіча здолела ўзяць першую перамогу ў чэмпіянаце. У Мінску 22 красавіка «Нёман» абыграў мясцовае «Тарпеда» з лікам 1:0. Адзіны гол у сустрэчы забіў Максім Яблонскі на 88-й хвіліне.
У Мінску гродзенцы дамінавалі на працягу ўсёй гульні, але вось мяч у вароты гаспадароў ўсё ніяк не мог заляцець. І гэта нягледзячы на тое, што Кавалевіч наперадзе сваёй каманды выкарыстаў усе свае козыры. Удача паспрыяла «Нёману» толькі ў самым канцы матчу, калі Лукашэвіч на 88-й хвіліне аддаў шыкоўны пас на Яблонскага. Каб трапіць у вароты суперніка, Максіму ўсяго толькі трэба было добра прабіць па мячы.
«Тарпеда» (Мінск) — «Нёман» (Гродна) — 0:1.
Старшы трэнер «Нёмана» Павел Бацюта пасля матчу:
— Ехалі ў Мінск за перамогай. Сур’ёзна рыхтаваліся да матчу. Крыўдна было б па такой гульні нават згуляць унічыю. Даціснулі суперніка. Лічу, перамога заслужаная па ўсіх паказчыках. Забілі прыгожы гол. Ці чакалі, што так Лукашэвіч і Яблонскі ўсё так выканаюць? Спадзяваліся. Лукашэвіч, калі гуляў у Літве, шмат забіваў. Цяпер ён у апорнай зоне, але ў патрэбны час дапамагае наперадзе.
— Як сябе адчувае Хвалько пасля сутыкнення са штангай?
— Візуальна пасля заканчэння гульні усё добра. Можа быць, гэта з-за адрэналіну. Але наогул, непрыемная сітуацыя: ён і ўдар грудной клеткі атрымаў, і галавой стукнуўся. Спадзяемся, што ўсё будзе добра.
У чэмпіянаце Беларусі «Тарпеда» і «Нёман» сустракаліся праз 14 гадоў. Апошні матч гэтых супернікаў праходзіў у далёкім 2004 годзе ў Мінску. Тады гродзенцы таксама абыгралі мінчан, толькi з лікам 2:1.
Пасля чатырох тураў «Нёман» з 6 ачкамi размясціўся на 7 месцы. Свой наступны матч каманда Ігара Кавалевіча правядзе ў Гродне 28 красавіка і будзе прымаць мінскае «Дынама».