Таямнічыя падзямеллі Гродна — адна з самых жывых гарадскіх легенд. Паводле чутак, усе касцёлы ў цэнтры калісьці былі звязаныя паміж сабой, а нават існаваў ход праз Нёман. Пакуль міфічных хадоў не знайшлі, Hrodna.life запрашае на невялікую экскурсію па адным з вялікіх старадаўніх падвалаў старога горада. Можа, акурат ад іх і пайшлі байкі пра танэлі?

Падвал на Савецкай, 7 шмат год ніяк не выкарыстоўваўся. Усяму віной — пастаянныя падтапленні. Зараз, калі вада адступіла, падвал можна паглядзець. Колькі яму гадоў - сказаць цяжка. Камяніца, у якой ён знаходзіцца, з 19 стагоддзя. Гэты будынак вядомы тым, што тут у 1863 годдзе праходзілі таемныя сустрэчы паўстанцаў і тут неаднаразова бываў сам Канстанцін Каліноўскі.

Глядзіце, як па-рознаму выглядаюць суседнія старыя падвалы ў цэнтры Гродна
Яшчэ ў 1990-х на будынку павінны былі павесіць памятную шыльду ў гонар паўстанцаў, але пасля ўлады пра яе забыліся.
Цалкам верагодна, што падвал старэйшы за саму пабудову. У такіх сутарэннях гродзенцы захоўвалі гародніну, садавіну і іншыя прадукты. Часам у іх нават жылі або ладзілі піцейныя ўстановы.

Добры прыклад выкарыстання падвала можна пабачыць зусім побач. Практычна праз сценку знаходзіцца кафэ «Раскоша». Хіба што толькі сутарэнні там меншага памеру ды і выкарыстоўваюцца практычна з канца 1940-х. Некалі ў памяшканні над падвалам была сталовая рамеснага вучылішча, дыетычная сталовая, затым вельмі папулярная ў горадзе «Дамавая кухня», «Блінная», «Астра». А сёння кафэ «Раскоша».

Можа і суседні закінуты падвал гэтага будынка калі-небудзь давядуць да ладу і адкрыюць там нешта цікавае? А пакуль ён выглядае так: