Мясцовы дэпутат Алена Бераснева падключылася да абмеркавання будучыні двара на Ажэшкі, 42. Выказацца яе прасілі жыхары дома, якія за яе галасавалі. Нагадаем, жыхары незадаволеныя, што ў іх двары з’явіцца двухпавярховае кафэ.
Заказчыку гэтую тэрыторыю пад забудову прадаставіў горад наўзамен знесенай чабурэчнай на вуліцы Ціміразева. Чабурэчную знеслі, бо генплан прадугледжвае там будаўніцтва дарогі.
Цягам двух тыдняў жыхары дома сустракаліся ў двары з прадстаўнікамі гарвыканкама і заказчыкам. Але бакі не прыйшлі да адзінага меркавання. На апошняй сустрэчы жыхары дома былі абураныя, што іх не падтрымлівае новаабраны дэпутат Алена Бераснева.Як даведаўся Hrodna.life, наўпрост да Алены Берасневай ніхто з жыхароў дома па вуліцы Ажэшкі не звяртаўся. Пра іх абурэнне яна даведалася з СМІ.
Дэпутатка будзе гатова прыняць незадаволеных, калі дасканала вывучыць сітуацыю з будаўніцтвам. Хутчэй за ўсё, сустрэча адбудзецца пасля выходных у мясовым ЖЭСе. Пра дату і час сустрэчы жыхароў дома паінфармуюць загадзя.
