У лютым гэтага года прадстаўнікі «Яндэкс.Таксі» абвясцілі, што сэрвіс у Беларусі будзе адноўлены. У кампаніі плануюць, што «Яндэкс.Таксі» прыйдзе ва ўсе абласныя гарады і райцэнтры Беларусі.
— Мы ведаем, што ў Беларусі мяняецца закон аб аўтамабільных перавозках і ён закране рынак таксі. Мы вельмі чакалі змены. У сваю чаргу, мы можам дзяліцца сваімі тэхналогіямі з горадам, а сэрвіс зробім не горш, чым у Расіі, а можа, нават і лепш. Хто ведае, можа быць, у Мінску мы створым якую-небудзь супер IT-платформу з новымі рашэннямі, — распавёў «Тут.бай» дырэктар па развіцці бізнесу «Яндэкс.Таксі» у Расіі і Беларусі Аляксей Фядотаў.
«Яндэкс.Таксі» даступны ў 300 гарадах сямі краін, да сэрвісу падключана больш за 400 тысяч кіроўцаў. Дарэчы, Беларусь стала першай краінай, куды «Яндэкс.Таксі» прыйшоў пасля Расіі.
Цяпер партнёраў - а значыць, і машын — у сэрвісу стала больш. Абяцаюць, што хутка беларусы змогуць выклікаць машыну не толькі праз смартфон, але і, напрыклад, праз адмысловую стойку ў гандлёвых цэнтрах або аэрапорце, а тарыфы пры гэтым не памяняюцца. Дарэчы, цяпер заплаціць за паездку можна наяўнымі або праз тэрмінал, у будучыні з’явіцца магчымасць прывязаць да дадатку банкаўскую карту і плаціць безнаяўнымі (грошы будуць аўтаматычна спісвацца з карты).
Зараз у сэрвісе два тарыфы: «Эканом» і «Камфорт» — яны адпавядаюць сярэднім коштам па рынку. У будучыні з’явяцца тарыфы «Бізнес» (машыны прадстаўніцкага класа) і «Мінівэн» (вялікія машыны на 6−7 чалавек з ёмістым багажнікам).
