Летась гродзенская мастачка Іна Папаратная перамагла ў конкурсе ілюстратараў дзіцячых кніг, а сёлета ў кастрычніку з’явілася першая кніжка з яе ілюстрацыямі “Собака Фрося и ее люди” Святланы Лаўровай. “Мая першая кніжка! Яшчэ вачамі не бачыла і рукамі не кранала! Вельмі радасна і нечакана. Хаця і чакана” – пісала Іна ў ў сацсетках 2 кастрычніка. Пра сабаку Фросю і ды іншыя змены ў творчым жыцці Іна расказала Hrodna.life
Перамога ў конкурсе “Новая детская книга” застала Іну на вялікім тэрміне цяжарнасці і дала права праілюстраваць адну з кніжак выдавецтва “Росмен”. Такім чынам, ад лістапада чакала Іна адразу дваіх – уласнае чацвёртае дзіцятка і героя кнігі, жыццё каторага трэба было намаляваць.
Дачушка з’явілася на свет ў снежні. Мама-мастачка падзялілася яе ўласнаручна намаляваным партрэтам.
Другая гераіня гэтага года – сабака Фрося, мільгнула ў стужцы Іны ўжо ў маі.
“У кнізе класна, ярка апісана гэтая сабачка: ёй жыць цікава, а нават калі сумна, яна ўсё роўна, хоць і мімаволі знойдзе прыгоды. Знешні выгляд пароды басет вельмі асаблівы, выразны – хаця трохі сумны. Але для Фросі аказалася нескладана дамаляваць ўсмешку.”
Сакрэт таго, што з чатырма дзецьмі ўдаецца яшчэ і працаваць, вельмі просты, мяркуе Іна. “Мне заўжды дапамагае і падтрымлівае муж. І я вельмі шчаслівая”.
Калі Іна малявала кнігу пра Фросю, перад сном чытала аб прыгодах сабачкі сваім дзецям. Ім падабалася, смяяліся.
-А пакажы карцінкі – прасілі малыя
-Тут карцінак яшчэ няма, я іх толькі малюю – адказвала мама.
І вось зараз, напачатку кастрычніка, кніга пабачыла свет.
“Першая кніга для мяне – падзея асаблівая. Дасведчаныя ілюстратары кажуць, што гэта наогул цуд – трымаць у руках уласную выдадзеную кнігу. Вядома, прызнанне ў асяроддзі ілюстратараў і проста гледачоў – гэта таксама вельмі важна. Добрыя словы, пахвала, зваротная сувязь – гэта ж наогул “ежа” мастака”.
З ілюстраваннем дзіцячых кніг, мяркуе Іна, яна знайшла сваю сцежку ў творчасці. “Яшчэ калі закончвала каледж мастацтваў, то малявала ілюстрацыі да кніг. Нават дыпломнай працай былі ілюстрацыі да “Хронік Нарніі”. Таму магу сказаць дакладна – кніга і ўсё, што з ёй звязана – адназначна маё.”
Зараз Іна супрацоўнічае яшчэ і з дзіцячым часопісам “Крынічка” ды малюе ілюстрацыі для календара на наступны год.
Што да кніжкі, то яна хутка з’явіцца і ў гродзенскіх кніжных крамах, каторыя сочаць за навінкамі выдавецтва. Іна ўжо атрымала прапанову правесці ў адной з іх аўтограф-сесію. Застаецца толькі дачакацца, каб “Сабака Фрося і яе людзі” даехалі да Гродна.
