Круці педалі за прызы! Што атрымаюць пераможцы веламарафона «Суседзi»

Тры новенькіх смартфоны, планшэт, ровар і яшчэ шмат падарункаў - хіба гэта не дастатковая падстава прыехаць і выпрабаваць свае сілы на Аўгустоўскім канале?

Удзельнікі веламарафона «Суседзi», што пройдзе пад Гродна 15 ліпеня, спаборнічаюць у 36 заліковых катэгорыях. Прызавая тройка будзе вызначацца ў кожнай з іх. Гэта значыць, што ўзнагароды атрымаюць больш за 100 чалавек.

Пераможцам у катэгорыях Open на дыстанцыях «Марафон» і «Паўмарафон» дастануцца смартфоны апошняга пакалення Huawei P10 і Huawei P10 lite. Яшчэ адзін смартфон Huawei P8 lite атрымае пераможца «міні-марафону» ў катэгорыі Open-Дзеці (хлопчыкі да 12 гадоў, дзяўчынкі да 14 гадоў). Смартфоны прадастаўлены спонсарам мерапрыемства — кампаніяй Huawei.

Прыз для пераможцы ў катэгорыі Open-Жанчыны на дыстанцыі «Марафон» — планшэт. Спонсарам гэтай намінацыі стала гродзенская кампанія REF-IT, якая займаецца продажам і рамонтам мабільнай і камп’ютарнай тэхнікі.

Прызы для ўзнагарод у астатніх катэгорыях прадаставілі ТАА «Инвелум», кампанія МТС, ЗТАА «Нормарк» (афіцыйны прадстаўнік брэнда SHIMANO ў Беларусі), сетка крамаў «Твой Велік», веласіпедная майстэрня veloservis.by, інтэрнэт-крама on-bike.by.

Не застануцца без увагі і самыя маленькія веласіпедысты, якія возімуць удзел у «Дзіцячым велазаезде». Усе яго ўдзельнікі атрымаюць памятныя падарункі ад кампаніі Huawei, а яго пераможцы будуць узнагароджаны сертыфікатамі на наведванне гульнявога комплексу «Банана Сіці».

У завяршэнні мерапрыемства сярод усіх удзельнікаў заездаў «Марафон», «Паўмарафон» і «Міні-марафон», прысутных падчас на цырымоніі ўзнагароджання, адбудзецца розыгрыш горнага ровара MERIDA Matts 6.10 ад кампаніі «VeloZona». Мадэль абсталявана паўпрафесійным абсталяваннем і выдатна падыходзіць для катання як у горадзе, так і па перасечанай мясцовасці.

Арганізатары веламарафона выказваюць шчырую падзяку ўсім спонсарам і зычаць удзельнікам поспехаў на дыстанцыі.